Politikki

NUUMMIT NUUNNEQ Borgmesterit nalunaarusiaat ilisimasaqarfigisimanngikkaat

Borgmesterit pingasuusut nalunaarusiartik "Naligiimmik siunissaqarneq" kommunalbestyrelsitik akuutinnagit namminersuussimarpasippaat.

Allattoq Inge S. Rasmussen

februaarip 18-at 2016 10:06

Nutserisoq Simon Uldum -

Tamannalu Qeqqata Kommuniani kommunalbestyrelsimut ilaasortap Agathe Fontainip Inuit Ataqatigiinneersup ajuusaarnartippaa, borgmesterillu taamatut suleriuseqarnerat suleqatigiinnissamut qaaqqusinngitsutut nalilerlugu.

Suliffinnilli siammarterisoqartariaqarnera Fontainip isumaqatiginerarpaa.

Aamma atuaruk GE: Suliffiit nuunneqarnissaat ineriartortitsiviussanngillat

Nuutat nuuffissaminnut isumaqassapput, Agathe Fontain erseqqissaavoq, Qeqqatalu Kommuninia borgmesteri Hermann Berthelsen kajumissaarpaa Kangerlussuup mittarfiata ataannarnissaa ilungersuutigeqqullugu. Mittarfimmi matuneqassappat suliffiit 500-t annaaneqassapput, Agathe Fontain taama mianersoqqussuteqarpoq.

Aamma atuaruk Suliffinnik nuutsitsinissat qanoq akeqassanersut suli missingersorneqanngillat

Borgmesterit ataatsimoorlutik tusagassiorfinnut nalunaaruteqarnerminni nassuerutigaat nalunaarusiaq kommunalbestyrelsiminni suli eqqartorneqarsimanngitsoq.

- Nalunaarusiap kommunalbestyrelsitsinnut saqqummiunnissaa qilanaarivarput, Hermann Berthelsen, Jørgen Wæver Johansen aamma Ole Dorph taama allapput.

Nalunaarusiartillu allanit, soorlu Naalakkersuisunit aamma Kommuneqarfik Sermersuumit oqallisigineqarnissaa aamma neriuutiginerarpaat.