Kommuneqarfik Sermersuumi IA borgmesterilu akiuussusersuisoqarnerani qaangiiginnarsimaneq pillugu siusinnerusukkut isornartorsiorneqarput.Assi: KNR

Borgmesteri nakutitsinersoq eqqartuussissuserisut misissussagaat

Eqqartuussissuserisut arlaannaannulluunniit attuumassuteqanngitsut, Nuummi akiuussusertittoqarnera pillugu misissuissapput, taakkulu inerniliippata Demokraatit iliuuseqarusupput.

Inuit Ataqatigiit tunuliaqutaralugit Kommuneqarfik Sermersuumi borgmesterip Charlotte Ludvigsenip, akiuussusertinnissamut utaqqisunit allanit siulliulluni akiuussusertissimanera qanorpiaruna pisimasoq?

AAMMA ATUARUK Akiuussusersuinermut ataqatigiissaarisoq: Borgmesteri atorfilittallu salliullutik akiuussuserneqarniassagamik sioorasaaripput

Apeqqut taanna eqqartuussisuserisut arlaannaannulluunniit attuumassuteqanngitsut misissuiffigissagaat, ataatsimiinnermi ippassaani kingusissukkut aalajangerneqartoq, Demokraatit tunuliaqutaralugit kommunalbestyrelsemi ilaasortaq Justus Hansen oqarpoq.

Borgmesterip akiuussutisserneqarneqarnera pillugu suliaq:

 

  • Nuummi innuttaasunut tamanut akiuussusersuinissamut sisamanngornermi juulip ulluisa 22-anni marluniit tallimat tungaanut atuarfimmi USK-imi neqeroortoqarpoq.
  • Nalunaaqutarli tallimanngunngitsoq akiuussutissat nungummata utaqqisut akiuussusersuisunit angerlartinneqaannartariaqarput.
  • Inuttaasut arlallit akiuussusersortikkusullutik akiuussusersuineq aallartinngitsorli silami utaqqillutik siuleriiaatilereerput.
  • Siuleriiaattut ullup ingerlanerani amerliartuinnarput. Siuleriiaaqangaarmallu siuleriiaat Hotel Hans Egedep nalaanut killipput. Akunnerpassuarnillu utaqqereerlutik akiuussuserneqarsinnaanatik paasitinneqarput.
  • Borgmesteri, Charlotte Ludvigsen taassumalu atorfilittai pingasut siuleriaattut ullaap tungaani saneqquppaat, taakkulu matukkut allakkut isertinneqarput. Atorfilittat silataani siuleriaattunik nakkutiginninnermi ikiuuttussaapput.
  • Akiuussutissalersuinermut ataqatigiissaarisup, Anna Wangenheimip oqarnera naapertorlugu taakku akiuussutisserneqarnissamik piumsaqarput – taamaattoqanngippallu siuleriiaattuni ikiuiniarnatik.
  •  Kommunip siorasaaruteqartoqarneraanera itigartitsissutigaa – borgmesterillu tamanna ”paatsooqatigiinnerusimassasoq” ilimagalugu.
  • Borgmesterip siuleriiaattunik qaangiiginnarluni utaqqisorpassuit allat sioqqullugit akiuussutisserneqarsimanini utoqqatsissutigaa.
  • Namminersorlutik oqartussat utoqqatsertoq: “ Kukkusimanerput nassuerutigaarput, sialussuup ataani akunnerpassuarni utaqqisimasut akiuussuserneqaratillu angerlartiinnartariaqarsimagatsigit. Akiuussusersorneqanngitsoornerallu soorunami naammaginanngilluinnarpoq. Akiuussusersuinissamullu aaqqissuussinerlunneq pillugu utoqqatserpugut.

- Charlotte Ludvigsenip akuersaarneqarsinnaanngitsumik inuppassuit utaqqisut saneqqutiinnarlugit atorfilittanilu akiuussusertissimanerat pillugu qanimut isersimaqatigalugu oqaloqatiginissaa, Demokraatinit piumasarisimavarput.

- Oqaloqatigiinnermilu tassani piumasaraarput, Charlotte Ludvigsen itinerusumik nassuiaassuteqassasoq, Demokraatit sinnerlugit kommunalbestyrelsemi ilaasortaq Justus Hansen KNR-imut oqarpoq.

Ataatsimiinneq pissuserissaartumik torersumillu ingerlasoq, taanna nassuiaavoq. Piumasarisimagitsillu tamanna pillugu iternga tikillugu nalunaarusiortoqassasoq.

Nalunaarusiortitsiniartut

Borgmesterimulli sinniisussat tullia siulleq, Justus Hansen, aperaarput sooq nalunaarusiornissaq pisariaqarnersoq.

AAMMA ATUARUK Inuit Charlotte Ludvigsenip qaangeraanera pillugu: Pissusissamisuunngilaq

- Tunngavissaqarnata inunnik naqissusiisinnaanngilagut. Taamaaliussagutta politikkikkullu sulianik torersumik ingerlariaqqissagutta iternga tikillugu paasisaqarluaqqaartariaqaratta, taanna oqarpoq.

Sunarpiarli peqqutigalugu misissuisoqartariaqarnera piumasarineraat aperaarput.

- Siorasaarisoqarsimanera pissaanermillu atornerluisoqarsimaneraanera misissussavarput, pisup taassumap tamakkiisumik qanorpiaq pisimanera misissussavarput tassa inuppassuit tunuleriaartut qaangiinnarlugit akiuussusertittoqarsimanera tamaat misissussavarput. Sooruna taamaaliortoqarsimasoq aammalu kikkut ilaasimappat?

Demokraatit sinnerlugit kommunalbestyrelsemi ilaasortap tusatsiakkat uppernarsaatissaqartinngisani ilumoornersut paasilluarusuppai.

- Pisut tusatsiakkanit aallaaveqartinnagit uppernarsaatissarserusuppagut soorlu peqqinnissarfimmi sulisut siorasaarneqarsimanerarneqarnerat atorfilittallu akornanni qanorpiaq pisoqarsimanera matumani qulaarusuppagut, Justus Hansen oqarpoq.

Nalunaarusiaq eqqartuussisulerisunit suliarineqassasoq Justus Hansenip oqaatigaa.

Suliffeqarfimmulli sorlermut tamanna imissutigineqassanersoq taassuma oqaatigerusunngilaa.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat