Borgmesteri naalakkersuisoqarfik pillugu tupigusuttoq
Naalakkersuisuisoqarfiup tatigeqatigiilluni isumaqatigiissutit tunuinnarpaat, kapisillit pillugit pilersaarut oqallisaaqisoq pillugu ulluni arfiniliinnarni periarfissiillutik tusarniaatitsigamik.
Kingorna tusarniaaneq ulluni sisamanik sivitsorneqaraluarpoq, taamaakkaluartoq Asii Chemnitz Narup naammaginnippianngilaq.
- Soorunami tupigisupilussuuara ullunik taama ikitsigisunik naalakkersuisoqarfimmiit tusarniaasitsisoqarmat. Ukiorpaalussuarni naalakkersuisoqarfiit KANUKOKA-llu akornanni isumaqatigiissuteqarnikuupput, aasaanerani sapaatit akunnerinik arfineq pingasunik minnerpaamik tusarniaanerit ingerlanneqartassasut. Taamaattumik isumaqatigiissutigineqareersut qulaatiinnarlugit periuseqartoqarnera akueriuminaatsupilussuuvoq, Asii Chemnitz Narup oqarpoq.
Tusarniaavimmiinngitsoq
Borgmesterillu tusarniaaneq isertupajaarluni ingerlanneqarnera uparuarpaa.
Taassuma oqaluttuaraa tusarniaavimmut tusarniaassutigineqartoq ilineqarsimanngitsorluunniit.
Kommunimmi arlaannaalluunniit ilanngunneqanngillat. Naalakkersuisoqarfiummi KANUKOKA kisiat tusarlerpaa, taakkualu kommuninut ingerlatitseqqinngillat.
Aamma atuaruk Kommuneqarfik Sermersooq: Tusarniaaneq pitsaanerusinnaagaluarpoq
Kommuneqarfik Sermersuumi sulisut ilaata tusarniaaneq ingerlasoq piaarinaatsoornikkut paasivaa, kingornalu aatsaat tusarniaassutit Kommuneqarfik Sermersuumut ingerlateqqinneqarput. Tamanna juunip 23-ni pivoq. Killiuliussamiit siullermiit ulloq ataaseq qaangiummat, piffissamilu tassani tusarniaaneq juunip 26-nut killilerneqaqqissimavoq.
Kapisilinniarneq kulturitsinnut ilaavoq
Asii Chemnitz Naruppilu isumaqarpoq siunnersuut innuttaasunut kalluisuummaat kulturittalu ingerlanneranut soorlu kapisilinniarneq ukiussamullu pilisarnermut innarliisuummat sukumiinerusumik tusarniarneqarnerusariaqaraluarlutik. Taassumalu saniatigut Nuuk aamma kapisilinnik tunitsiviujunnaartinniarneqarmat. Iliuusissat kommunimit annertunerusumik eqqartornissaannut piffissaqarfigerusunneqaraluartut:
- Nalinginnaasuusoq periuseq atorlugu ingerlatsisoqartariaqartoq naalakkersuisoqarfinninngaanniit naalakkersuisuniillu isumaqarsimavugut uparuartariaqarlugu aamma eqqunngitsuliortutut pissusilersorneq una akuersaaginnarsinnaannginnatsigu, Asii Chemnitz Narup taama oqarpoq.
Aamma atuaruk Sunngiffimmi kapisilinniartarneq Aalisarnermut Naalakkersuisoqarfimmit inerteqqutigineqalissaaq
KANUKOKAP tusarniaanermut akissummini erseqqissarpaa, ingerlatsineq ajuusaarnartutut isigigitsik piffissaliunneqartorlu sivikitsoq isornartoqartikkitsik.
