Kommuneqarfik Sermersooq: Tusarniaaneq pitsaanerusinnaagaluarpoq
Pilersaarummi siunnersuutigineqarpoq, sunngiffimmi kapisilinniartarneq inerteqqutaalissasoq taamatullu Nuummiut inuussutissarsiutigalugu aalisartut Nuummut tunisisarunnaassasut.
Tamannalu Kommuneqarfik Sermersuumi kommunalbestyrelsemi partiinit tamanit tassa isumaqatigineqanngilaq. Taakku aamma isumaqarput tusarniaanermi allakkiaq tamanut nassiunneqartoq paasissutissanik amigaateqartoq aamma atorsinnaanngitsoq.
Aamma atuaruk Sunngiffimmi kapisilinniartarneq Aalisarnermut Naalakkersuisoqarfimmit inerteqqutigineqalissaaq
Tusarniaanermi allakkiaq, aalisarneq pillugu siunnersuisoqatigiinnut aamma nassiuneqartoq KNR-imillu pissarsiarput naapertorlugu, kapisilinniartarnerup pitsaanerusumik nakkutigineqalernissaa siunertaavoq.
Nuummut tunisisarunnaassapput
Tusarniaanermi allakkiami naatsumik oqaatigineqarluni, Nuummiut inuussutissarsiutigalugu aalisartut Nuummut tunisisarunnaassasut. Taama siunnersuuteqarnermi nunaqarfinnut tunisisarnissaq qulakkeerniarneqarluni.
Tusarniaanermi allakkiami siunnersuutigineqartut tamakku, Kommuneqarfik Sermersuumi inuussutissarsiornermut ataatsimiititaliap ilaasortaasa tamarmiullutik isumaqatiginagit akueriumanngilaat. Taama oqarpoq ataatsimiititaliami siulittaasup tullia, Storm Ludvigsen, Inuit Ataqatigiit, oqarlunilu tusarniaanerup ingerlanneqarnera naammaginanngilluinnartuusoq.
KANUKOKA aalisarnermut siunnersuisooqatigiinni ilaasortaatitaqartoq, Kommuneqarfik Sermersooq sinnerlugu tusarniaanermut peqataatinneqarpoq. Taamaakkaluartoq Kommuneqarfik Sermersooq tusarniaaneq pillugu allakkiamik tigusaqarsimanngilaq.
Tusarniaaneq sivikitsoq
Tusarniaanermi ullut arfinillit iluini akisoqareersimanissaanik piumasaqaateqartoqartoq, ullut sisamaannanngortullu tamanna aatsaat kommunimit paasineqartoq, Kommuneqarfik Sermersooq nalunaarpoq. Tamatumalu kingorna tusarniaaneq ullunik pingasunik sivitsorneqarluni.
Tusarniaanermi allakkiami naatsunnguamik paasissutissiisoqarsimanera taamatullu paasissutissat amigarpallaanneri, kommunip inuussutissarsiorneq pillugu ataatsimiititaliaanit isornartorsiorneqarpoq.
Toqqortumik pissuseqarlutik nassiussiinnarnatik itisiliinerusinnaagaluarput
- Tusarniaanermi allakkiaq A4-luunniit ulikkaarnagu allanneqarsimasoq assut ersernerluppoq. Suut tunngavigineqarsimanersut itisilerneqarsimassagaluarput aamma Nuummi inuussutissarsiutigalugu aalisartut tunisisarunnaarnissaat pillugu itisiliinerusimasinnaagaluarlutik.
- Aamma itisilersimassagaluarpaat ukiuni pingasuni atuuttussami 45 tonsip pisassiissutigineqartut, uffali siorna taamaallaat 35 tonsiinnaat pisarineqarsimasut. Tamakku allakkiami ilaatinneqarsimasussaagaluarput, asuli toqqortortumik pissuseqarlutik nassiussiinnarnatik. Kommuneqarfik Sermersuumi inuussutissarsiornermut ataatsimiititaliap siulittaasup tullia, Storm Ludvigsen, Inuit Ataqatigiit taamaa oqarpoq.
Aalisarnermut Naalakkersuisoqarfik aamma KANUKOKA pisoq pillugu tamarmik maanna oqaaseqarusunngikkallarput.