Borgmesteri: Naak Sisimiuni politiit pigaartui?
- Paasitinneqarnikuuvugut sapaatit-akunnerisa naanerini politiit unnuakkut angalaartunik pigaartoqarneq ajortut. Suna pissutaava? Tamatumunnga politiit Sisimiuni ikippallaarnerat pissutaava? Taamaassimappat amerlineqarnissaat sulissutigineqarpa?
Qeqqata Kommuniani borgmesteri, Malik Berthelsen (Siumut), taama isornatorsiuingaatsiarpoq.
Sisimiuni ukiuni kingullerni persuttaasoqartarnerata kingunerisaanik innuttaasut piffissami sivitsortumi toqqissisimannginnermik annertuumik misigisaqartut, taanna allappoq.
Sakkortuumik nakuuserfigineqartoq
Pisumi kingullermi angut inuusuttoq 16-inik ukiulik sapaatit-akunnerata naanerani sakkortuumik nakuuserfigineqarpoq. Taassuma saassunneqarnermi kingorna annertuumik ajoqusersimanini pissutigalugu Danmarkimi Rigshospitalimut aallarunneqarpoq.
Politiit nalunaarfigineqaramilli suliaq misissuiffigaat, nakuusertoqarneranilu takkunnissimasinnaasussarsiorlutik Facebookimi marlunngornermi ujaasipput.
27-nik ukiulik sakkortuumik nakuusersimasutut pasineqarluni, Qeqqata Eqqartuussisoqarfiani sisamanngornermi sassartinneqarpoq, sapaatillu akunnerini sisamani tigummigallagassanngortinneqarluni. Ilisimannittup saaffiginninneratigut 27-nik ukiulik tigusarineqarsimanersoq, politikommissærip Karl Jørgen Lennertip sisamanngornermi sassartitsisoqareernerani oqaatigisinnaannginnerarpaa.
Innuttaasut toqqissisimanngitsut
- Tamanit naluneqanngitsutut eqqissiviilliornerit persuttaanerillu amerlanerpaat sapaatit-akunnerisa naanerini unnuakkut pisarput. Taamaattumik innuttaasut toqqissillutik misigisimanissaannut politiit unnuami takussaanerunissaat isumaqarpugut pingaarutilerujussuullunilu pisariaqaraluartoq, Malik Berthelsen allappoq.
- Pisunut ilungersunartunut uteqqiattunut Sisimiuni innuttaasut qatsusseqqapput toqqissisimanatillu. Taamaattumik ilungersunartumik piumasarivarput politiit unnuami takussaanerulernissaat piaartumik sulissutigineqassasoq, taanna taama allappoq.
Kalaallit Nunaata Politiivi: Oqaloqataarusuppugut - kissianni tusagasssiutitiguunngitsoq
Politiit pisortaat Bjørn Tegner Bay KNR-imut allakkamini ima oqarpoq:
- Borgmesteri persutaaanerit amerlanerannut isumakuloqatigaara – kisianni Sisimiuniinnaanngitsoq, Kalaallit Nunaannili tamarmi.
- Politiit Sisimiuni unnuami nakkutilliisarput. Ilumoorpoq, politeqarfik unnuami sulisoqarneq ajormat, taamaammallu nakkutilliiuartoqarani. Nuummi politeeqarfik kisimi unnuami sulisoqartarpoq,taamalillunilu nakkutilliiuartoqarsinaalluni. Illoqarfinni allani politiit nalunaarutiginnittoqartillugu namminnerluunnnit pisariaqartutut nalileraangamikku angerlarsimaffimminneerlutik orniguttarput.
- Ataatsimoorluta persutaasarneq unnuamilu toqqissisimanngittarneq qanoq akiorsinnaaanerigut, tamatumanilu politiit qanoq nakkutilliitigissanerannik kommunip isumaa pillugu, politiit Sisimiuni aqutsisua uangalu qanimut oqaloqatigiinnikkusuppugut. Kisianni kommuni politiillu toqqaannartumik taamaaliortariaqartut – tusagassiutit aqqutiginagit.
