Kommune Qeqertalimmi politikerit: Borgmestererput nukillaarsaatinngulerpoq

Borgmesteri, Ane Hansen, peqataatitsinanilu partiit allat politikkiannik apeqqutaannillu ilumoorussinngilaq. Kommune Qeqertallip kommunalbestyrelsiani ilaasortani Siumumeersoq Demokraatineersorlu borgmesterertik taama sakkortutigisumik isornartorsiorpaat.

Allattoq Thor Bill

februaarip 10-at 2024 11:20

Nutserisoq Hanne Petersen

- Maanna naammagiliivunga. Isumaqarpunga borgmesteri atuuffimminik nakkutiginninnerusariaqalersoq.

Kommune Qeqertallip kommunalbestyrelsiani ilaasortap Demokraatineersup, Simigaq Heilmannip, borgmesterertik Ane Hansen (IA) sakkortuumik isornartorsiorlugu allakkani taama aallaqqaaserpai.

Simigaq Heilmannimmi oqarnera naapertorlugu borgmesteri siammasissumik suleqateqarniarnanilu sulianik ingerlateqqitassatut politikkikkut aalajangikkanik piviusunngortitsisanngilaq.

Qeqertarsuarmi Siorarsuarni qimmiviliinissamik siorna juunimi siunnersuut, taassuma assersuutigaa.

Siunnersuut taanna kommunalbestyrelsimit akuerineqarmat ataatsimiititaliamut Inoqarfimmut (teknikkimut ataatsimiititaliaq, aaqq.) ingerlateqqitassanngortinneqarpoq. Ingerlateqqinneqarsimanngitsorli, Simigaq Heilmann oqarpoq.

Ingerlatitseqqittoqartannginneralu borgmesterillu tusarnaarumasannginnera nukillaarsaataasut, taanna KNR-imut oqarpoq.

- Una misigisarakku ajornartorsiutit qaqilerneqartillugit nipangersinneqarneq.

- Saaffiginnissutit qinikkatut uagut saaffiginnissutigut pingaaruteqarneri nakkutigisariaqaraluarpai, saaffiginnissutitta akineqarlutik ingerlateqqinneqarnissai aamma suliassaasa ilagisariaqaraluarai isumaqarpunga.

Kommune Qeqertalimmi Siumup gruppianni siulittaasoq, Aqqa Samuelsen, tamatumunnga tapersiivoq.

- Ajornartorsiutaaqaaq. Siunnersuutit ataatsimiititalianut ingerlateqqinneqartanngillat, ataatsimiititalianullu apeqqutivut aamma akineqartanngillat, taanna oqarpoq.

2022-mi uppiseriaraluaraat

Ane Hansen borgmesteritut atuuffini pillugu sakkortuumik aatsaat isornartorsiorneqalinngilaq.

Kommunalbestyrelsimimi Siumup gruppiata Ane Hansen suliassanik ilaginnaasarnerarlugu aalajangiiffigisassatut siunnersuummini allalluni 2022-mi aasakkut uppiseriaraluarpaa.

Borgmesterip kommunalbestyrelsip ataatsimiititaliaanut ataqqinninnginnera kommunalbestyrelsimilu ilaasortat allakkatigut saaffiginnissutiminnut akissutisisannginnertik ilaatigut tunngavilersuutigaat. Tamakkulu suli ajornartorsiutaasut, Siumumeersoq Aqqa Samuelsen oqarpoq.

- Assersuutigalugu imminut toqunnissamik pinaveersaartitsinermut periusissiornissamik siunnersuuteqarnikuuvunga, taannalu kommunalbestyrelsimi ataatsimiititaliamilu akuerineqareeraluarluni suli timitalerneqanngilaq, taanna oqarpoq.

Aqqa Samuelsen assersuuteqaqqippoq. Ikerasaarsuup eqqakkanik tigooraaveeraqalernissaanik kommunalbestyrelsi 2021-mi aggustimi akuersivoq. Allaallumi aningaasaateqarfik Miljøfonden tamatumunnga 1,7 millionit koruuninik aningaasaleereeraluarpoq.

Ikerasaarsulli eqqakkanik suli tigooraaveqalinngilaq tamatumalu sumik pissuteqarneranik ilisimatinneqarnikuunatik, Aqqa Samuelseni oqarpoq.

Tamannalu ilungersunaqisoq, taanna isumaqarpoq.

- Suliat taama pingaaruteqartigisut pinngitsooratik aamma kommunalbestyrelsimut ilaasortanut aammalu ataatsimiititalianut susassaqartunut ilisimatitsissutigineqartarnissaat minnerpaamik pisussaaffiusussaagaluarpoq. Ingerlateqqittarnissaat ilumoorunneqartarnissaallu pingaaqaaq.

Ilungersunarseriaannartoq

Borgmesterip uppitinneqarnissaanik siunnersuut kommunalbestyrelsimi amerlanerussuteqartut 2022-mi aggustimi itigartitsissutigaat.

Kommunalbestyrelsimili ilaasortat allat marluk aamma IA-meersut borgmesterip aqutseriaasianik aamma naammagiliipput.

Frantz Lundblad Karl Thue Nathanielsenilu Ane Hansenimut naammagiliillutik IA-miit aninissartik toqqarlugu Siumumut iserput. Taamaammat Ane Hansen IA-qatinilu katillutik arfineq-marluullutik Atassummeersoq ataaseq peqatigalugu kommunalbestyrelsimi maanna amerlanerussuteqaqqalaarput.

Borgmesterip suleqatiginiarnera Siumumi 2022-mi ilaasortanngoreernermini ilungersunarseriaannarsimasoq, Frantz Lundblad KNR-imut ilisimatitsivoq.

AMERLANERUSSUTEQAQQALAARTUT

Frantz Lundbladip Karl Thue Nathanielsenillu IA-miit anillutik Siumumut 2022-mi isernerat, Kommune Qeqertalimmi kommunalbestyrelsimi suleqatigiit IA Atassullu amerlanerussuteqaqqalaarnerannik kinguneqarpoq.

Kommunalbestyrelsimi ilaasortat katillutik 15-iupput, taakkunanngalu arfineq-marluk IA-meersuupput ataaserlu Atassummeersuulluni. Partiillu taakku suleqatigiiusut taamaammat amerlanerussuteqaqqalaarput.

Arfinillit Siumumeersuupput ataaserlu Demokraatineersuulluni.

Allisiguk

Isornartorsiuinerat ilisarinngikkaa

Isornartorsiut Ane Hansenimut nassiupparput.

Kommunalbestyrelsimili suleqatiginnikkusunnginnerarneqarnini ilisarisinnaanngikkini, taanna oqarpoq.

- Qanoq oqassuunga, namminneq taakku oqaatsitik akisussaaffigivaat. Kisianni siunnersuutit akuerineqartut soorunami suliarineqartarput.

- Soorlu ukua suleqatigiit Inuit Ataqatigiit Atassullu namminneerlutik saaffiginnittarput, aamma oqaloqatigiittarpugut saaffiginnissutaat aallaavigalugit.

Suliammi taakkua pioreermata atuutereerlutillu isornartorsiuinerat ilisarinagu, borgmesteri oqarpoq.

- Tunngaviit atugaat tunngavigalugit paasisinnaanngilara. Paasisinnaassagaluarpara inuit arlalissuit itigartitaasimallutik, qinnuteqarsimallutik, utaqqikatallutik pisimagaluarpata. Kisianni taamaattoqarsimanngilaq, Ane Hansen oqarpoq.

Nutaarsiassami kukkunermik nassaarsimaguit uunga allaffigineqarsinnaavugut.