Blok O-mi toqutsineq: “eqqaamasaqanngilanga”, 22-nik ukiulik oqarpoq

Angut 22-nik ukiulik arnamik 82-inik ukiulimmik Blok O-mi toqutsisimasutut siorna oktobarimi eqqartuunneqarsimasoq eqqartuussivimmiileqqippoq.

Allattoq Nicole Sander Bertelsen

februaarip 10-at 2025 16:51

Nutserisoq Connie Fontain

Angut 22-nik ukiulik Erneeraq Lundbladimik ateqartoq arnamik 82-inik ukiulimmik toqutsisimasutut pasineqarluni, Nuummi umiarsualivimmi ukiut marluk matuma siorna tigusarineqarpoq. Eqqartuussut suliarineqaqqitassanngortinneqarsimasoq Nunatta Eqqartuussisuuneqarfiani ullumi aallartinneqarpoq.

Suliami peqqarniitsumi Erneeraq Lundblad arnap 82-inik ukiullip angerlarsimaffiani 2023-mi januaarimi toqutsisimasutut, pinngitsaaliilluni kujannissimasutut, toqungasup timaanik assuarnartumik iliuuseqarsimasutut, ikuallatsitsisimasutut tillissimasutullu eqqartuunneqarsimavoq. Pinerluuteqarneq Eqqartuussisoqarfik Sermersuumi siorna oktobarip ulluisa sisamaanni paarineqartussanngortinneqarneranik aalajangiiffigineqarpoq.

KNR-ip taamaammat aqqa allakkaa

Eqqartuunneqartoq tarnikkut qanoq inneranik misissorneqarmat piffissami pinerliffiusumi maannakkullu tarnikkut napparsimanngitsoq oqaatigineqarpoq.

Toqutsineq ilisarisimanngisamik toqutsineruvoq. Tassa imaappoq eqqartuunneqartoq pinerlineqartorlu pisoq sioqqullugu imminnut attaveqarfigisimanngillat.

Toqutsineq peqqarniitsuummat angut piffissami killiligaanngitsumi paarineqartussanngortinneqarpoq.

Tamatuma saniatigut KNR-ip eqqartuunneqartut ukiumit ataatsimit sivisunerusumik pineqaatissinneqartut aqqatigut taasarpai.

Aamma atuarukEqqartuussut: Toqutsisoq piffissami killiligaanngitsumi paarineqartussanngortinneqartoq

Angulli eqqartuussummut isumaqataanngilaq. Eqqartuussut erngertumik suliarineqaqqitassanngortinneqarpoq, suliarlu Nunatta Eqqartuussisuuneqarfianit suliarineqarnera ullumi aallartippoq.

Nassuiaateqarnera amigaateqartoq

Unnerluutigineqartoq nipaangaatsiarsimasoq Nunatta Eqqartuussisuuneqarfiani ullumi nassuiaateqarpoq.

Erneeraq Lundbladilli oqarnera naapertorlugu 2023-mi januaarip 31-ani ullaassakkut pisumik eqqaamasaqarpallaanngilaq.

“Eqqaamasaqanngilanga. Silattorama inissiaq ikuallappoq, uangalu ikittaammik tigummiaqarlunga”, taanna eqqartuussivimmi oqarpoq.

Aamma atuarukPeqqarniitsumik toqutsineq pillugu suliami unnerluutigineqartoq pinngitsuunerartoq

Angutip imigassamik annertuumik Ritalininillu pisimanerata saniatigut sianiutinik malugisanut sakkortusinartumik LSD-mik aamma seernartumik ilisimaneqartumik pisimasoq saqqummiunneqarpoq.

Eqqartuussuteqartoqassasoq

Suliami uppernarsaatit ilisimannittullu ulluni tulliuttuni nalunaajarneqassapput. Tamatuma saniatigut Erneeraq Lundbladip nuliassaa suliami ilisimannittutut nutaatut aamma aggersarneqarpoq.

Suliaq sisamanngorpat aalajangiiffigineqarlunilu eqqartuussuteqarfigineqassaaq. Unnerluussisussaatitaasup eqqartuussut taamaatiinnarneqassasoq tassa piffissami killiligaanngitsumi paarineqartussanngortinneqaqqaannassasoq piumasaraa.

Illersuisulli Erneeraq Lundblad pinngitsuutinneqassasoq, imaluunniit sivisunerpaamik ukiuni arfineq-pingasuni pineqaatissinneqarsimasunut inissiisarfimmiittussanngortinneqassasoq isumaqarpoq.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.