Aki-Matilda Høegh-Dam Siumumi tallimanngormat ilaasortaajunnaarpoq. Taanna Naleqqami ullumikkut ilaasortanngorpoq.

Taassuma tamanna KNR-imit apersorneqarnermini uppernarsarpaa.

Aki-Matilda Høegh-Damillu Naleraq tunuliaqutaralugu Inatsisartunut marsip aqqarnanni qinersinissamut qinigassanngortilluni aamma uppernarsarpaa.

- Misigisimavunga eqqortumik iliorlunga. Pissutigalugu naleqartitakka qimannginnakkit, kisianni nassaareqqittutut illugit, maqaasisimasannut uterama, Aki-Matilda Høegh-Dam KNR-imut oqarpoq.

- Sapaammi ullup ingerlanerani eqqarsaatigilluareerlugu nalunaarfigaara siulittaasoq allakkatigut, qinnuteqarlunga ilaasortanngornissannut. Taassumalu kingorna ilisimatinneqarpunga siulersuisuunerit allallu ataatsimiissutigeqqaassagaat. Maannakkullu nalunaarutigisinnaanngorparput pisortatigoortumik, tassa akuerineqarpoq ilaasortaanissara, taavalu ilaasortaanermut akiliut akilerneqarsimavoq. Pisortatigoortumillu tassa qinigassanngortittussatut Inatsisartunut ilanngunneqarlunga.

Naleraq Siumumit naalagaaffinngornissaq pillugu sutigut pitsaanerua?

- Naleqqakkunnut tipisiuiartorninni paasigakku, tassa siumukkormiuiit, maqaasinikuusakka, naalagaaffinngorusuttut, oqaatitsinnik pingaartitsisut, kalaallinik salliusserusuttut, maqaasisartagara oqallittariaaseq aajuna, qaminneqarsimanngilaq. Allamununa pisimasoq.

- Uanga isiginnittariaasera malillugu Siumuvik ornippara.

Aki-Matilda Høegh-Dam qinigaaffiup naanissaata tungaanut Folketingimi ilaasortaassaaq - Siumulli tunuliaqutarinagu Naleraq tunuliaqutaralugu.

Partiimut allamut nuunnissamut eqqarsaatersuuteqartoq

Naalakkersuisut siulittaasuata, Múte B. Egedep (IA) Inatsisartunut qinersinissamik suaaruteqarneranit sapaatip akunneraanngitsorluunniit qaangiuppoq – Siumumullu siulittaasup, Erik Jensenip neriuuteqarneratulli aallartinngilaq.

Kuno Fenckerimmi Aki-Matilda Høegh-Damillu qineqqusaarneq partiimut allamut nuunnissaminnik ammasumik eqqarsaatiginninnerminnik aallartippaat. Taakkumi naalagaaffinngornissamik suliaqarneq sukkanerutikkusuppaat, Siumullu arriippallaarsimasoralugu.

Siumumili pisoqarpoq, partiimmi siulittaasuata, Erik Jensenip namminiilivinnissamut suliaqarneq sukkanerulersinniarlugu paragraf 21-lu namminersorneq pillugu inatsimmiittoq aallartinnissaa qineqqusaarutiginiarlugu sisamanngormat oqaatigaa. Paragraf taanna naalagaaffinngornissamut aqqummik nassuiaaneruvoq, taannalu naapertorlugu innuttaasunut taasititsisoqassaaq. Ukiullu sisamat tulliuttut ingerlaneranni innuttaasunut taasititsisoqassasoq, Erik Jensenip DR-imut sisamanngormat tassanngaannartumik oqaatigaa.

Taanna – Inatsisartuni partiit amerlanerit allat assigalugit – naalagaaffinngornissamut ulluliinissamut tuaviuussisuunngikkaluarpoq. Sammivimmilli allannguineq Aki-Matilda Høegh-Damip Naleqqamut nuunnissaminut uniffiginngilaa.

Taassuma uissaata Kuno Fenckerip Siumumi siunissani suli eqqarsaatersuutigaa.

Folketingimut qinigaalluartoq

Aki-Matilda Høegh-Dam Folketingimut 2022-mi qinigaaqqippoq. Taanna 6.655-init taaguunneqarpoq, nunatsinnilu qinersisut pingajorarterutaallutik.

Tamanna 2019-imi qinersisoqarnerani taaguunneqarneranit marloriaatingajaannik siuariarneruvoq.

Aki-Matilda Høegh-Dam Siumumi 2023-mi siulittaasunngorniunnermi aamma qinigassanngortinnikuuvoq, Erik Jensenimulli ajorsarluni.

Kuno Fencker Inatsisartunut kingullermik qinersisoqarmat 66-init taaguunneqarpoq, taannalu Inatsisartuni sinniisussatut ilaasortaalluni.