Pele Brobergip Aki-Matilda Høegh Dam parteeqatigilersinnaanissaa pillugu oqaloqatigigaa

Naleqqap siulittaasuata, Pele Brobergip, partiimut ilaasortaaffeqanngitsoq, Aki-Matilda Høegh Dam, Naleqqamut ilaasortanngorsinnaanissaa pillugu arfininngormat oqaloqatigisimallugu KNR-imut uppernarsarpaa:

- Uppernarsarsinnaavara tassa arfininngormat attavigineqarama Aki-Matilda Høegh-Dam-imit, Naleqqap siunertaa, angunigai taakku tunngaviusut, saqqummiunnikuusagut tallimat pillugit, taanna oqarpoq.

Pele Brobergip maannakkuugallartoq oqaaseqarnerusinnaanani oqaatigaa. Kisianni sapaatip akunnerata naanerani oqaloqatigiinneq politikkimut tunngassuteqartoq oqaluttuaraa.

Tulluusimaassasoq

Pele Brobergip oqarnera naapertorlugu Aki-Matilda Høegh Damimik oqaloqateqarnermini Naleqqap anguniagai pillugit oqaloqatigiittoqarpoq.

- Oqaloqatigiinnerput arfininngormat ajunngitsorujuuvoq. Imatut paasillugu uanga misigisorujuuvunga Naleqqap anguniagaanut tulluartorujunnik oqariartuuteqaqattaartoq. Akerlianillu aamma uanga oqarfigaara, unneqqarillunga, kalaallinik illersuisarnera, namminiilivinnissatsinnullu saqqummiisarnera, soorunami aamma uagut nuannarigipput Naleqqamiit.

Siumumit qinigaalluartarsimasoq Inatsisartunut qinersinissami Naleraq tunuliaqutaralugu sassassappat Pele Broberg tulluusimaassaaq:

- Uagutsinnut aalajangiussissappat, inissittoqassappat, uanga taanna soorunami tulluusimaarutigiumaarpara.

Aki-Matilda Høegh Damip maanna parteeriunnaarsimasaanut, Siumumut, sapaatip akunnera pisoqarfioqaaq.

Aki-Matilda Høegh Dam Naleqqamut ilumut ilaasortanngornersoq suli ilisimaneqanngilaq. Kisianni ullumi nalunaaruteqarnissani naatsorsuutigalugu KNR-imut oqaluttuarpoq.