Aki-Matilda Høegh-Dam siunissaminut isumaliuuteqartoq: Siumup innera soorlumi qamissimasoq

Siumumit Folketingimut ilaasortaq, Aki-Matilda Høegh-Dam, partiimut allamut nuunnissaminik Inatsisartunullu qineqqusaarnissaminik eqqarsaateqarpoq. Siumumi naalagaaffinngornissamut suliakippallaartut, taanna isumaqarpoq. Aamma siulittaasup naalagaaffinngornissaq pinartutut qinersinerup kingorna isigineqartoq oqaatigereeraluaraa.

Allattoq Ivik Kristiansen

februaarip 07-at 2025 07:36

Siumup naalagaaffinngornissamut sulineq qinersinerup kingorna pimoorunniarpaa. Siulittaasoq Erik Jensen taama oqarpoq.

Tamannali Siumumut ilaasortap Aki-Matilda Høegh-Damip naammaginngilaa. Ersernerluppallaartoq, taanna isumaqarpoq.

Taassuma sunissani maannakkut isumaliuuteqarfigaa.

- Tamuagassaqarpunga, kisianni paasiartuaarunarpara Siumut tunngaviminit ingerlaqqissimasoq, Siumumit Folketingimut maanna ilaasortaq Aki-Matilda Høegh-Dam oqarpoq.

Aamma atuarukKalaallit Nunaat namminiilivissappat Danmarkimit tapiissutit annertussusissaat isumaqatigiinniutigineqartariaqassasut

DR-imit apersorneqarluni siunissaminut nalornissuteqarluni oqareerpoq. Partiimut allamut nuussanerluni, Inatsisartunullu qinigassanngortissanerluni maanna eqqarsaatigalugu KNR-imut maanna paasissutissiissutigaa. Sulili aalajangernani erseqqissaatigaa.

Ingammik naalagaaffinngornissamut apeqqut taassumunnga partiillu siuttuinut isumaqatigiinngissutaasoq, Aki-Matilda Høegh-Dam oqarpoq.

Aamma atuaruk Inatsisilerinermik professori: Kalaallit Nunaata namminiilivinnissaanut Danmark naaggaarsinnaavoq – tamannali ilimananngilaq

Siumup siulittaasua, Erik Jensen, namminersorneq pillugu inatsimmi paragraf 21-p aallartinnissaani alloriaqqinnissaq pinartutut isigalugu sulissutiginiarlugu oqaraluarpoq.

Oqaaseq ataaseq aalajangiisuulluinnarsinnaavoq

Tamannalu Siumup ataatsimeersuarnerani isumaqatigiissutigineqartunut naapertuuttoq oqarpoq.

Tamannalu Aki-Matilda Høegh-Damip isumaqatigaa. Amerlavallaartoriarlunili tusaasarsimallugu oqarpoq. Aamma Jensenip KNR-imut oqarneranut innersuussivoq. Erik Jensenimi ima oqarpoq:

- Inatsisartutigoortumik akuersissutigineqarpoq kommissionimik ingerlatsilluni suliaqartoqassasoq, taassuma saniatigut aamma immikkut isumaqatigiinniarnernik pilersitsisoqarsinnaanissaa mattusimaneqanngilaq.

Uiguullu ataaseq inituallaartoq Aki-Matilda Høegh-Dam isumaqarpoq.

Aamma atuarukKuno Fencker Siumumut ilaasortaajunnaassanerluni eqqarsartoq

- Taanna eqqaamaniarpara, oqaaseq -sinnaavoq atoqattaaraa. Taamaattoqarsinnaavoq. Periarfissaasinnaavoq. Erseqqissumik nangaanani oqartoqarnissaa pisariaqartipparput. "Uagut taassagutsigut, aallartissaaq". Taamaattumik ataasiaannarlungaluunniit tusagaqanngilanga.

Tassalu Siumup maanna politikkikkut isumaa namminerlu politikkikkut isumaa assigiinngippaallaalersimanersut maanna eqqarsaatigalugu oqaatigaa.

- Siumup innera soorlumi qamissimasoq. Taamaammat apeqqutaavoq, massakkut qanoq ingerlariaqqissanersunga.

Illit isummat pingaartittaqaarput. Nutaarsiassaq pillugu isorisat nersualaarinerillu uani tikilluaqquagut.