Borgmesteri inissiinermut suliaq pillugu: Akisussaaffik tamaat tiguara
Angerlarsimaffiup inissiinermi suliaq Kommune Qeqertalimmi ukiut qulit ingerlaneranni suliarineqarsimasoq saqqummiunneqarpoq, suliarlu ombudsmandimit isornartorsiorneqangaatsiarpoq.
Kommune Qeqertalimmi borgmesterip, Simigaq Heilmannip (D) angerlarsimaffiup avataanut inissiinermi suliap taama sivisutiginera alianartuusoq KNR-imut nassuerutigaa.
- Uani uanga oqaaseqarfigerusuppara taama alianartigisumik saqqummertoqarnera akisussaaffik tamaat tigullugu, taanna oqarpoq, nangillunilu:
- Sumiginnaasimaneq una inunnik aamma sulisunik takussutissiisoq politikkikkut pingaarnersiuinissatsinnut takussutissiisoq ersarissumillu sulisunut, meeqqanut inuusuttunullu politikkeqarnissatsinnut tikkuussisutut oqaatigerusuppara.
Suliaq KNR-ip siusinnerusukkut saqqummiussaa angajoqqaamut meeqqaminik marlunnik angerlarsimaffiup avataanut inissinneqarsimasunik ukiuni qulini angerlartitsiniarsimaneranut tunngavoq. Angajoqqaajusoq Kommune Qeqertalimmi arlaleriarluni qinnuteqaasiortarpoq, iluatsinngitsunilli, suliarlu suli naggaserneqanngitsoq meeqqat inersimasutut ukioqalerput, angajoqqaajusorlu toqukkut qimagulluni.
Sinaakkutit pitsaanerusut pilersinneqassasut
Simigaq Heilmannip kommunimi inunnik isumaginnittut inissiinermi sulianik kivitsisinnaasut piffissami matumani naammanngitsut amerlanerusullu pisariaqartinneqartut nassuerutigaa.
Kommunimi inunnik isumaginnittut pitsaanerusunik atugassaqartinneqalissasut borgmesterip erseqqissaatigaa. Taassumalu inunnik isumaginnittut piginnaasaasa ineriartortittuarneqarnissaat pisariaqartoq takusinnaavaa.
- Oqartarpunga socialrådgiverinik naammattunik kommunerput peqanngilaq, kisianni sulisoqarpugut sullissisut, inunnik sullissisut taakkua isumaqarpunga kommunermi sinaakkutaat, soorlu pikkorissarsinnaanerat, tarnikkut isumassorneqarnerat taakkununnga tunngasut iliuuseqarfigisariaqavippagut, taanna oqarpoq, nangillunilu:
- Taavalu politikkikkut una ilaqutariinnut peqataatitsilluni sullissinissamik, naleqartumillu sullissinissamik ilaqutariit pineqartut pisariaqartitaannik ikorfartuisinnaanissamik politikkeqarutta aamma sulisutsinnut nalorninaatsumik sullissinissamik sinaakkusiissammat uagut taanna politikkikkut pingaartipparput.
Kommunip meeqqanut inuusuttunullu ingerlatsinermi tunngaviusoq suliaraa, taannalu isumaginninnermi ataatsimiititaliaannut INUIT-mut saqqummiunneqangajalerpoq.
Simigaq Heilmannip naggasiutigalugu kommunip meeqqat inuusuttullu pisariaqartitaannik tunngaveqartumik politikkikkut suliniuteqartoqarnissaanut ataatsimut akisussaaffeqartoqarnissaa pingaaruteqarnerarpaa, taannalu meeqqat sulianut tunngatillugu utaqqiinnannginnissaat pillugu aaqqissuunneqassaaq.
KNR-ip angerlarsimaffiup avataanut inissiinermi maannakkut suliat aamma aamma suliat ukiunik pingasunit ukiunut arfineq-pingasunut sivisussuseqartut qanoq amerlatiginerat kiisalu Kommune Qeqertalimmi inunnik isumaginnittut qanoq amerlatigisut atorfeqarnersut pillugit kisitsisit takunnissinnaaffigai. Taamaammat suliaq una malinnaavigineqarpoq.
