Biskoppi: Apersortitsinerit avillugit
Upernaakkut apersortittussat siulliit påskip ulluisa aappaani pinissaat piareersarneqarput.
Apersortittoqarneranili ilaquttat qaniginerpaasallu kisimik naalagiaqataasarnissaat innersuussutigineqarpoq
Tamanna Tunillaassortunik nappaalanersuaqarneranut ataatsimiititaliarsuup inassuteqareerneratigut taamaasiortoqarpoq.
Biskop Sofie Petersen, nunatsinni palaseqarfinnut tamanut taama nalunaaruteqarpoq.
AAMMA ATUARUK Biskoppi : Marsip 31-ata tungaanut oqaluffinni naalagiartitsinerit unitsinneqarput
Biskop Sofie Petersenip nalunaarutigereerpaa, Kalaallit Nunaanni naalagiartitsisarnerit tamarmik 31 marts tungaanut unitsinneqassasut.
Taamaaliortoqarpoq nualluutip coronavirusip tuniluunnissaa pinaveersaarniarlugu.
Apersortitsinerit taamaatinneqanngitsut
Kisianni apersortitsinerit peqataaffigineqarluartartut taamaatinneqanngillat.
- Aportittoqarnerani ilaqutaasut qanigisaasullu kisimik najuunnissaat innersuussutigineqarpoq Biskop Sofie Petersen taama oqarpoq.
Ullunik allannguisinnaaneq kinguartitsinerluunniit
Apersortitsinissat ulluisa allanngortinneqarnissaannut palasit periarfissineqarput:
- Assersuutigalugu oqarutta apersortittussat 20-upput, maani Nuummi, taava ilaqutaasut ilanngukkunik oqaluffik ulikkaavittussaassaaq, ikinngutit ilanngunneqarunik , taava palaseqarfimmit aalajangertoqarsinnaavoq apersortittussat qulit imaluunniit tallimat apersortissapput, ullormi tassani, palasit imaluunniit palaseqarfiit aalajangersussavaat namminneq, biskop Sofie Petersen taama oqarpoq.
Palaseqarfiit ataasiakkat namminneq aalajangiissapput
Taamaattumik palasit allannguutissanik iliuuseqartariaqarput
Inuit 100-nik amerlanerusut ataasimuunnginnissaanik innersuussutigineqartoq malinniarlugu palasit arlalinnik qinigassaqarput:
Apersortittussat avinneqarsinnaapput, ullormi tassani, immaqaluunniit taamaatitsisoqarsinnaavoq, Sofie Petersen oqarpoq. - Ullormiit ullormut allanngortitsisoqartartoq tusartarpagut, apeqqutaavoq qanoq ingerlariaqqissanersugut, palaseqarfinni ataasiakkaani malittarisassaat malissavaat, nakorsaaneqarfimmiit innersuussutigineqartut naapertorlugit, biskop Sofie Petersen taama oqarpoq.
AAMMA ATUARUK Danmarkimi naalagiartitsinissaraluit taamaatiinnarneqartut