Birgitte Aka Nielsen Tuukkaq nuannaarutigivaa – Norsarli maqaasissamaarpaa
Norsaq inuppassuarnik Atlantiku qulaallugu Københavnimiit Kangerlussuarmut utimullu ukiuni kingullerni 24-ni timmisartuussisareerluni taarserneqalerpoq. Norsarli ”nutaaq”, tassa Tuukkaq atulissaaq.
Timmisartut taakku ilusimikkut assingugaluaqalutik ingammik pisorpaluttarnermikkut assigiinngissuteqangaatsiarnerat malugusunnaqisoq, Norsami ukiuni 15-ini aquttoq Michael Madsen oqarpoq.
Taanna sulliseqarluni aquttarfimmiittoq naapipparput. Soorlu tassa biilinut nutarluinnarnut ikilluni, taanna qungujulluni oqarpoq.
Tuukkaq pillugu:
305-inik ilaasoqarsinnaavoq, issiaviit akisunerusut 42-t akikinnerillu 263-it.
Arfineq marlunnik perusuersartarfeqarpoq.
Timmisartumi ilaasut WiFi-kkut internetimut attaveqarsinnaapput.
Ilaasunut ataasiakkaanut uuttortarlugu ikummatissaq atortagaa CO2-mik anitsitsinera 25 procentimik annikinneruvoq.
Norsaq Tuukkarlu assigiinngissuteqangaatsiarnerat malugusunnarnera nuannaarutigigini, Michael Madsen oqarpoq.
- Timmisartortartuusugut perpalunnginnerunera malugusuutigeqaarput. Iluaqaaq, tassami Københavnimiit Kangerlussuarmut utimullu timmisartuussigaangatta nalunaaquttap akunnerini 13-ini aquttarfimmiittaratta malugusunnaqaaq, Michael Madsen oqarpoq.
Norsami ukiuni 15-ini aquttuusoq
Michael Madsen misilittagartuujuvoq, taannami Norsami ukiuni 15-ini aquttuuvoq.
Tuukkaq nunatsinnut merngaariartorluni ingerlaarnera immikkuullarissuuvoq, aquttarfimmummi matu matoqqasaraluartoq ippassaq angalanermi ammaannarpoq.
Ilaasut taamaalillutik timmisartortartut aquttarfiannukarsinnaasimapput.
Michael Madsen Tuukkaq siullermik nunatsinnut mereersoq Foto: Johannes Olsen/ KNR
Birgitte Aka Nielsen ukiuni 34-ini saqisuusoq. Tassunga Tuukkaq ippassaq nunatsinnukaqqaarnera aamma nuannersimaqaaq.
- Ilaasut assigiinngitsorpassuupput: Kalaallit, qallunaat, franskit, tuluit. Kikkut tamaavissuisa ilaasartorigatsigit nuanneqaaq, tulluusimaarnaqaaq ingerlaarluni.
AAMMA ATUARUK Air Greenlandimi isumaqatigiissusiortoqarmat suliumajunnaarnissaq taamaatiinnarpoq
Taanna Tuukkap igaffianik aamma ilusilersueqataasimavoq.
- Aatsaavissuaq timmisartumut nutaaqqeqqinnaamut ilaavunga, assut nuannerpoq aamma uku atortut nutaagamik atoruminarlutik. Ilaannikkut iggavimmi atortugut pisoqqat Norsamiittut ilai oqimaallutillu equngallutik pisaramik. Taava makkua tamarmik oqittuinnaallutik. Assorsuaq mutiuvoq aqukkuminarluni.
Avissaarnissaq sapernartoq
Tuukkaq nutaarluinnaalluni nutaalliaalluinnaraluartoq Birgitte Aka Nielsenip Norsaq maqaasissamaarpaa.
- Soorunami Norsaq maqaasinassooq, aamma sakimminassooq soorunalimi taamaatilerutsigu ukiorpassuit suliffigaara. Misigisarpassuit tiimerpassuit timmisartorfigisimallugu eqqumiissooq soorunalimi.
Taamaakkaluartoq Birgitte Aka Nielsenip Tuukkaq nuannaarutigaa. Siunissamilu ilaasorisartagassami naapeqqinnissai qilanaaralugit oqarpoq qungujullunilu.
Naalakkersuisut siulittaasuat aamma Tuukkap nunatsinnukaqqaarnerani ilaavoq.
- Tulluusimaarnaqaaq. Inuiaat kalaallit tulluusimaarutissaqarpugut, nunarsuarmioqatigiit taamatut inupparujorujussuarnik innuttaasullit naligalugit taamatut uagut aamma alloriarsinnaasuseqarnerput
AAMMA ATUARUK Isumaqatigiissut nutaaq: Air Greenland angutinit arnanillu atorneqarsinnaasunik atisaqartitsilissasoq
Tuukkaq Kangerlussuup Københavnillu akornanni decembarip 19-ani timmisartuussilernissaminut piariissaaq.
Tuukkaq Kangerlussuup Københavnillu akornanni decembarip 19-ani timmisartuussilernissaminut piariissaaq.
Air Greenlandip timmisartorsuaq Norsaq, martsip aallaqqaataata tungaanu pigissavaa. Tassannga tuniniarneqassalluni.
Tuukkaq 700 miillion koruuninik akeqarpoq, Air Greenlandillu timmisartuutaani akisunerpaalluni.
Foto: Aviâja Kilime/ KNR
