Biilliimimi ukiormanna juullisiortoqanngilaq
Biilliimimi Jesusip inunngorfiani juullisiortoqassanngilaq palæstiinami kristumiut Biilliimimiiittut arlaqartut taama oqarput.
Takornariat tusintilikkaat decemberip ulluisa 24-anni 25-annilu Biilliimimi oqaluffimmukartarput oqaluttuaq naapertorlugu jesusip inunngorfianut nersutaatit nerisarfiata nalaani oqaluffiliarineqartumut.
Takornariat ukiormanna Biilliimimukanngillat, oqaluffiullu saava juulliaqqami inoqarpianngilaq.
Takornariat Biilliimimukannginnerannut pissutaavoq, Gazami Biilliimimit 50 kilometerisut ungasitsigisumi sorsuttoqarmat, qaammatillu kingulliit marluk ingerlaneranni inuit 20.000-nik sinneqartut toqutaanerat.
Gazami toqutaasut ataqqiniarlugit juullimi nipaallisimasoqarniarpoq.
- Juulli nalliuttorsiutiginianngilarput artorsaateqartorujussuugatta taamaaliorsinnaanngilagut. Orpilissanik pinnersaatinilluunniit takunissatsinnut piareersimanngilagut, Biilliimimi kristumiut palæstiinamiuusut aviisimut
Financial Times-mut taama oqarput
Jesusi Maari Josefillu assilillugit inuusaliat Jesusip inunngorfiata nalaani oqaluffimmiittut, oqaluffiup saavanut inissinneqarput, qarmasissianik aamma ungerutissianik kapinartulinnik assersorneqarsimasunik.
Biilliimimi borgmesteri oqaluttuarpoq juulli ukiormanna allaanerujussuusoq.
- Biilliimimi juulli allaanerujussuuvoq. Palæstiinami illoqarfiit allat assigalugit ulluni makkunani aliasuttoqarpoq. Aliasuppugut Biilliimimi borgmesteri taama oqarpoq.