Tusagassiuutit: Bidenip Alaskap ilaani uuliasiortoqarsinnaannginnissaa siunniuppaa
Alaskap ilaani uuliamik ujarlermi qillerinerit ikilineqarnissaat Issittullu Imartaani qillerinerit taamaativinneqarnissaat, amerikamiut præsidentiata Joe Bidenip siunniuppaa.
USA-mi naalakkersuisut oqaaseqartitaat aviisimut Washington Postimut nutaarsiassaqartitsivimmullu AP-mut ippassaq sapaammi taama oqarpoq.
Peqqussutit nutaat taakku ullumi ataasinngornermi pisortatigoortumik nalunaarutigineqarnissaat naatsorsuutigineqarpoq. Alaskap nunataata tamarmiusup 3 procentiani qillerinerit killisorneqalernissaat tassani pineqarpoq.
Sumiiffinni pineqartuni timmissat assigiinngitsorpassuit uninngaartarfigaat tuttullu angallavissuaralugit. Aamma nannut uumasullu allat nungutaanissaannik aarlerinaatillit ingerlaarfigisarlugit.
Taama siunniussaqarneq Alaskami sumiiffinni allani uuliamik qillerinissamik pilersaarutit dollarsinik milliarderpassuarnik naleqartussaq Willowillu pilersaarutaanik aallaaveqartoq, USA-mi naalakkersuisut tunaartaraat.
Tamanna Alaskami nunap inoqqaavisa aningaasarsiornerannut ilaatigut iluaqutaassasoq, pilersaarummut isumaqataasut oqaatigaat.
Tamannali Bidenip sila avatangiisillu pillugit pilersaarutaanut killormut aalajangernerusoq, akerliusut oqaatigaat.
Illoqarfiup Nuiqsutip eqqaa Willowip pilersaarutaa naapertorlugu qilleriviusinnaasunut ilaavoq, taanna Utqiagvimmit 218 kilomerterisut ungasitsigisumiippoq.
Nuiqsutip eqqaa nunarsuatta kiatsikkiartornerani eqqugaanerpaasut ilagaat. Tamanna nunarsuatsinnut allanut naleqqiullugu pingasoriaammik kiannerulersimavoq.
