Bidenip nunami eqqissisimatitami uulia gassilu pillugit isumaqatigiissutit unitsikkallarai

Isumaqatigiissutit USA-mi nunamut imminermut ministereqarfiup avatangiisit qanoq sunneqarneqarneranik misissuereernissaata tungaanut unitsinneqarallarput.
Biden præsidentimut qineqqusaarnermini pinngortitami eqqissisimatitamik  Arctic National Wildlife Refugemik illersuiniarluni neriorsuuteqarnikuuvoq. Assi © : U.S. Fish and Wildlife Service Headquarters/flickr
Allattoq Ritzau
juunip 02-at 2021 10:30
Nutserisoq Jaaku Lyberth

Alaskami pinngortitami eqqissisimatitami uuliap gassillu aqqutissaanik sanaartornissaq USA-p præsidentiata Bidenip allattoqarfianit unitsinneqarallarpoq. 

Isumaqatigiissummi avatangiisinut sunniutaasut misissorneqareernissaanut unitsinneqaqqassapput.

USA-p nunamut imminermut ministereqarfia marlunngornermi paasissutissiivoq.

Avatangiisinut sunniutigisinnaasaannut isumaqatigiissutit misissorneqaqqaassapput tamannalu naammassineqarpat uuliap gassillu aqqutissaanik sanaartornissamut isumaqatigiissutit nanginneqassanersut atorunnaarsineqarlutilluunniit, USA-mi nunamut namminermut ministereqarfik allappoq.

Aalajangernerup allanngortinneqarneranut pissutaavoq, præsidentiusimasup Donald Trumpip USA-mi taamatullu Alaskami ikummatissaat uuliamersut aamarsuarneersullu annertusarniarnerigaluanit aallaaveqartoq.

AAMMA ATUARUK Trump Alaskami eqqissisimatitami uuliasiornissamut akuersiniartoq

Biden præsidentimut qineqqusaarnermini pinngortitami eqqissisimatitamik  Arctic National Wildlife Refugemik illersuiniarluni neriorsuuteqarnikuuvoq.

Pinngortitaq eqqissisimatitaq 78.000 kvadratkilometerisut annertutigisoq, nannunit tuttunit timmisannillu najorneqartarpoq.

Avatangiisinut illersuiniaqatigiit iluarisimaaruteqartut

Alaskami avatangiisinut illersuiniaqatigiit arlaqartut aalajangerneq iluarisimaarpaat. Uuliap gassillu aqqutissaanik sanaartornissamut isumaqatigiissutit unitsinneqarnissaannut sivisiuumik ilungersuuteqarsimapput.

Præsidentiusimasup Donald Trumpip præsidentip illorsua Det Hvide Hus januarimi sapaatit akunneri marluk sioqqullugit qimattussaagaalu pingortitami eqqississimatitami aatsitassanik ujaasinissamut akuersissutit tunniussisoqarpoq.

Suliffeqarfiit uuliamik gassimillu nunami eqqissisimatitami ujaasinissaminnik akuersissuteqartut nutaarsiassassaq tusarliunneqartoq pillugu suli oqaaseqanngillat.

Aamma atuaruk