Barentip imartaani umiarsuartoqarsinnaalissaaq

Silaannaap kissatsikkiartornerata kingunerisaanik issittumi siku saannerulerpat Barentip imartaatigut umiarsuarmik angalasalernissaq periarfissaqalersinnaavoq.

Nunat issittut inatsisartui Sverige-p avannaani illoqarfimmi Kirunami ataatsimeersuarnerat ullumi aallartippat, Barentip imartaatigut umiarsuarmik angalasalersinnaanermut apeqqut ullormut oqaluuserisassani pingaarnernut ilaavoq. Nutaarsiassaqartitsivik Ritzau taama allappoq.

Ataatsimiititaliami Sverigemingaaneersutuaq, inatsisartunut ilaasortaq Folkpartiimeersoq, Runar Patriksson, oqarpoq, silaannaap kissatsikkiartornerata Barentip imartaatigut umiarsuit atorlugit siunissami angalasinnaalernissaq periarfissaqalersissammagu, periarfissat taamanikkussamut suusinnaanersut maannangaaq qaammarsaatigineqarnissaat pisariaqartoq.

Issittoq ornissallugu ilisimatusarfigissallugulu kajumigineqartorujussuuvoq. Pingaartumik pisuussutit assigiinngitsut tamaani pissarititaasut eqqarsaatigalugit. Assersuutigiinnarsinnaavarput uuliaqarfiit gasseqarfiillu suli nassaarineqanngitsut annertoorujussuit tamaani nassaassaanissaat ilimagineqarpoq.

Nunat issittut inatsisartuisa arfineq-aappassaanik ataatsimiinnerani Sverigemi inatsisartut ingerlatsisuupput. Ukioq allortarlugu ataatsimeersuartoqartarpoq, kingullermik ataatsimeersuartoqarmat, tassa 2004-mi Nuuk ingerlatsisuuvoq.

Avatangiisit, ilisimatusarneq, ilinniartitaaneq attaveqatigiinnerlu pillugit apeqqutit Kirunami ataatsimeersuarnermi nunanit aqqanilinnit peqataasut 150-t missaanniittut ilaatigut sammissavaat.

Ataatsimeersuarnermi Kalaallit Nunatsinnit peqataavoq ataatsimiititaliamut nunatsinniit ilaasortaq, Kuupik Kleist, IA.