’Barbenheimer’-ip kalaalerpassuit filmeriartippai

Nuummi Katuami filmertarfiup billetsit ukioq manna juulimi siorna taamaalineranut naleqqiullugu 20 procentit missaannik amerlanerit tunivai.

Tamatumunnga pissutaavoq filmit aningaasarpassuarnik isertitsissutaasut marluk ”Barbie” aamma ”Oppenheimer” silarsuarmi tamarmi malunnaateqaqisumik ”Barbenheimer”imik pilersitsimmata.

- Sulisunik saniatigut aggeqqusisariaqarsimavugut. Kioskerput sapaatip akunneranut arlaleriarluni nunguutsisarpoq, taamalu nioqqutissanik amerlanerusunik piniartariaqarluta, Katuami filmertarfiup pisortaa Ruth Heilmann oqarpoq.

Siorna juulimi Katuap billetsit 3408 tunivai. Ukioq manna Katuap billetsit 4073 tunivai.

Kisitsisinullu taakkununnga ilaanngillalluunniit meeqqanut filminut takutitsinernullu minnerusunut kisitsisit.

DR naapertorlugu aamma Danmarkimi taamaappoq. Danmarkimi filminik attartortitsisartut peqatigiiffianni, Forening af Filmudlejere i Danmark, siulittaasoq Frederik Juul oqaluttuarpoq juulimi siornamut naleqqiullugu billetsit 25 procentinik amerlanerit tunineqarsimasut.

Danskit filmertarfiliarrassimapput Barbenheimer-i aamma silap masannartuliornera pissutigalugit.

Nuummi filmertarfimmi tunisinermut piumasaqaatit Danmarkimisut ipput, taamaakkaluartorli Ruth Heilmannip Barbie-filmip taama nunannarineqartiginera tupaallaatigaa.

- Filmertarfimmut isaasoqarluarnissaa ilimagisimavarput. Kisianni taama amerlatiginngitsut. Ajunngitsumik uissuummissutigaarput, oqarpoq.

Barbiep Oppenheimer ajugaaffigaa

Soorlu aqqata ersersikkaa Barbie pivoq Barbie-p silarsuaani aappaluttoq qaquaartumi. Oppenheimer qaartartorsuup atomitortup pilersitsisua pillugu  oqaluttuami taartumi ingerlavoq.

Katuami isiginnaariat inuusaq aappaluttoq qaquaartoq pillugu filmiliamik immikkut nuannarinnissimapput. Taasariaqartumik  quianartuuvoq amerlasuut aappaluttoq qaquaartunik atisaqarmata.

- Amerlasuut aappaluttoq qaquaartunik taskeqarput, tujuuluaraqarlutik  imaluunniit qungasequteqarlutik, Ruth Heilmann oqarpoq, nassuiaallunilu tassanerusut meeqqat atukkersorsimasut.

Barbie-filmip qiimasuunera inuit amerlanerit nunatsinni nunarsuullu sinnerani filmertarfiliarnerannut peqqutaassangatinneqarpoq.

Amerikami tusagassiuut Deadline naapertorlugu Barbie-filmi juulip naanerani silarsuarmi tamarmi 780,7 millioner dollarsinik kaaviiaartitsisimavoq. Assigai  koruunit 53 milliardit sinnerlugit.

Oppenheimer kaaviiaartitsisimavoq 405,6 millioner dollarsinik. Assigaa koruunit 27,5 milliardit.

Naak kisitsisit maani minnerugalugartut, silarsuup sinneranisut ipput.

Nuummi Katuaq Barbie-filmimut 1665 billetsinik tunisaqarsimavoq, aali filmip kingullermik takutinneqarnerata kisitsisai ilanngunnagit. Oppenheimer billetsinik 1032-nik tunisaqarfiuvoq.

Sisimiuni Taseralimmi filmertarfimmi Barbie billetsinik 183-inik tunisaqarfiuvoq marloriarluni takutinneqarnerani. Oppenheimer taamaallaat billetsinik 114-inik tunisaqarfiuvoq pingasoriarluni takutinneqarnermini.