VIDEO AWG-mi sisoraatinik unammiffiusussat piareeqqatartut
Sisarorarfiup sisorartunut aqqutiliuutai sanaartugassanullu sullissivik GNC aputinik sisoraaserluni ooqattaasarfimmut Ukkusissat eqqaannut, apummik amigaateqarnerusimasumut, assartuipput.
Sisoraarserluni ooqattaasarfiliornermut ilisimasalik Canadamit tikippoq, unammiuaarnissaannut piareersagassat piariissasut taassuma erseqqissarpaa. Sisoraatinik unammiffiusussanik unammiuaartoqarnissaannut piareersaaqataavoq, ullumikkullu sisamanngornermi tamarmik piareersimasussaapput.
Aamma atuaruk Nuussuup Atuarfia unammiuaarianik najugaqarallarfigineqarnissaminut piareersarneqarpoq
Sisoraatinittaaq unammiffiusussap Qinngutsinni Ukkusissat eqqaanni apummik aallertoqarpoq.
Ersarissumillu akineqarpugut aperigatta aputeqarluarnersoq:
- Naamik, aputikippallaarpoq, Christian oqarpoq.
Nuuk piffissap taamaalinerani apummik amigaateqarsinnaanera aaqqissuisuinut tamanullumi tupaallatitsivoq.
- Apummik marsimi amigassalluta takorloornikuunngilarput. Kisianni pissutsit taamaapput, AWG-mi pisortap tullersortaa Arnakkuluk Jo Kleist oqarpoq. Suliassanillu suliarinnittussat arlaqartut suliarinninnissaat ernumassutiginngilaa.
Aamma atuaruk Issittumi Sakkutooqarfik AWG-qarnerani ikiuutissaaq
- Ernumanngilagut. Aput naammattoq, Canadamiup sisoraarserluni ooqattaasarfiliornermik ilisimasallip tikinnermini oqaatigaa. Aputinik assartuisoqannginerani tamanna oqaatigaa, Arnakkuluk Jo Kleist oqarpoq.
Marlunngormat apersorneqareernerata kingorna apingaatsiarpoq, unammiuaarnerit ataasinngorpat aallartilerpata peqataasussat sisoraatinik unammiffiusussat qilanaarutigisinnaavaat.