AWG2016 Nuussuup Atuarfia unammiuaarianik najugaqarallarfigineqarnissaminut piareersarneqarpoq

Sonja Hansen, AWG-mi namminneq kajumissutsimikkut suliallit allat peqatigalugit, Nuussuup Atuarfiani timersorlutik unammiuaariartussat siniffissaat maanna inissitsitileruttorpai. 

- Unammiat 3-400-ut missaat maani najuqaqartussaammata siniffiit quleriit 200-ut missaaniissagunarput, AWG 2016-imut nammineq kajumissutsiminik suleqataasoq Sonja Hansen oqarpoq. 

Timersorlutik unammiuaariat 2000-ngajaat arfininngorpat tikinnissaat pilersaarutaavoq, taakkulu Nuummi meeqqat atuarfiini tallimaasuni atuartitsivinni najugaqartinneqassapput. Isumagisassallu ikitsuinnaanngillat.

- Init tamaaviisa misissussavagut, nalunaarsorlugit, kikkut tamaani najugaqassanersut, qassiussanersut, aamma pequtit qanoq inissisimanersut nalunaaqutserneqarsimanersullu annisinnginnerminni. Siniffiit eqqussuutinnginnerani, tamakku isumageqqaassavagut, Sonja Hansen oqaluttuarpoq.

Atuartut saqqummersitsisut

AWG 2016-imik suliaqartuinnaat ulapinngillat. Unammiuaariat tikerannginneranni, Nuussuup atuarfiani atuartut immikkut sammisassaqartinneqarnermikkut aamma ulappussimapput.

- Nuannarisorujuuaat. Aamma torsuusami igalaajusarsuarmi inuusat kalaallisuulersukkat, 4. klassimi atartunit, suliarineqarnikut  alakkarneqarsinnaapput. Unammianngooq kalaallisut aamma ilikkalaarniassammata kalaallit taagutai tuluttut nutsersimasatik aulami aamma nivinngaassorpaat, Nuussuup Atuarfiani pisortaq, Janne K. Lyberth oqarpoq.

Atuarfinni pineqartuni atuartut aqaguminngaanniit, martsip pingajuanniit, ukiaanerani atuanngiffeqarallassapput .