Canadamiut premierministeriat nittarsaassinermi: Avatangiisit pingarnersiuinermi salliutinneqassapput
Premierministerillu hockey pillugu quiasaaraluni aallartippoq, Canadamiut tusagassiortullu najuuttut assut nuannarisaannik. Tamatumalu kingorna PDAC-p - The Prospectors & Developers Association of Canada - siulittaasuanik Glenn Mullanimik oqaloqateqarnini aallartippaa, aatsitassarsiornerullu Canadamut pingaaruteqassusia ukiunilu makkunani ineriartortitsiffiunera eqqartorlugu.
- Ullut allanngorfiusussat nalaanniippugut, puckillu (hockey, aaqq.) sumut ingerlaneranut - sumiinneranuunngitsoq - kikkut tamarmik naleqqussaleruttorput, Justin Trudeau oqarpoq.
AAMMA ATUARUK Kunngissap nunarput soqutigineqarnerulersippaa
Nunap inoqqaavinut isumaqatigiissutit taakkulu akuutinneqarnissaasa sianigiuarnissaat aatsitassarsiornermut pingaaruteqartuusoq, avatangiisillu pingaaarnersiuinermi salliutinneqartarnissaat premierministerip aamma erseqqissaatigaa.
- Canadamit naatsorsuutigineqartoq tassaavoq kingulissatta siunissaannut ajoqutaasussanik iliuuseqannginnissarput. Inuiaqatigiinni aningaasaqarnermut avatangiisinullu tunngatillugu. Imeq kingulissatta imigassaat silaannarlu najuussugassaat mingutsissanngilagut, premierministeri oqarpoq. Aammattaaq suliaqarfiup iluani nutaaliorneq ilisimatusarnerlu oqaluuserineqarput. Tamatumanilu Justin Trudeau ersarilluinnartumik oqariartuuteqarpoq.
- Ilisimatusarnermik aatsitassarsiornermillu ingerlatsinermik avissaartitsiniarsarisut kinguussaareerput. Ilisimatusarnikkummi piiaavinnik ingerlatsineq pikkorinnerulerfigissavarput piiaaviillu nutaaliornermut atugassanik pilersuissapput. Tassalu seqerngup nukinga atorlugu nukissiuutinut, biilinut innaallagiatortunut, elektronikkimut allanullu atugassanik.
AAMMA ATUARUK Kinamiut aatsitassanik pisiortornerat ima pissaaq
Justin Trudeau naapertorlugu suliaqarfimmi nutaaliorluni ineriartortitsinissamut pissutissaqarluarpoq.
Tunisassiornerummi aningaasartuutikillisarnissaa misissoraanni, aamma mingutsitsinnginnerunissaq ilanngullugu misissorneqassammat.
- Aningaasaqarnermut ilaqutaasussat avatangiisinut iluaqutaasussanit avissaartinneqarsinnaanngillat. Taakku ingerlaqatigiissinneqartariaqarput, ministeri isumaqarpoq.
Suliffeqarfiit politikerillu avatangiisinik pingaartitsinertik nittarsaassinermi oqaatigaat, soorlu aamma Kunngissap oqalugiarnermini tamani avatangiisit eriagisariaqarnerat erseqqissaatigisaraa.
