Aatsitassarsiorneq pillugu Canadami nittarsaassineq: Kunngissap nunarput soqutigineqarnerulersippaa

Kunngissaq aatsitassarsiorneq pillugu Canadami nittarsaassisoqanerani ammaanermi oqalugiarnermini nunarput nersualaarlugu oqaluttuarisarpaa. Aatsitassarsiorneq, pinngortitamik, avatangiisinik inunnillu eriagisaqarneq ingerlaqatigiissinneqassapput, kunngissaq oqarpoq.

Nunatta pinngortitaanik nuannarisaqarneq innuttaanullu nuannersumik atassuteqarneq kunngissap aatsitassarsiorneq pillugu Torontomi ulluni makkunani nittarsaassisoqarnerani oqalugiaataani imartuupilussuupput.

- Kalaallit Nunaanni pinngortitaq nunarsuarmi sumiiffinnut allanut naleqqiullugu sakkortunerpaamik malugisarpara, kunngissaq nunatsinni aallartitat danskit Torontomi sinniisoqarfiannut sapaatiummat tikilluaqqugamigit taama oqarpoq.
 
  • Sulisitsisut, Naalakkersuisut, Kunngikkormiut, Dansk industri danskillu naalakkersuisui nunatta aningaasalersuisartunut aatsitassarsiortunullu nunarsuarmit tamaneersunut nittarsaannissaanut inuit 70-init amerlanerusut aallartippaat.
  • Aningaasaqarneq pillugu Siunnersuisoqatigiit 2018-imut nalunaarusiaat naapertorlugu aatsitassat nunatsinni piiarneqarsinnaasut ilarpassui akitsornissaat naatsorsuutigineqarpoq.
  • Suliniutit arlallit ukiuni aggersuni aallartinnissaat naatorsuutigineqarpoq.
  • Aatsitassarsiornermut akuersissuterpassuit tunniunneqartut pilersitsisoqarneranik kinguneqassappata, nunatta aningaasaqarneranut iluaqutaallualersinnaapput.

Kunngissap aamma Sassuma Arnaa pillugu oqaluttuaq eqqartorpaa.

AAMMA ATUARUK - Aatsitassasiornissamut aningaasaliinissaq pilerinarsartariaqarpoq

Kunngissaq nunatsinnit aallartitat siuttuuffiginerini suliassaqarluarpoq. Sinniisoqarfimmi tikilluaqqusivoq, taava nunatsinneersut nittarsaassinermi saqqummersitsiviat qiorsilluni pisortatigoortumik ammarpaa, sapaatiummallu Greenland Dayimik taallugu aaqqissuussinermi Kunngissaq aamma tikilluaqqusisuuvoq.

- Kalaallit Nunaat sinniisuuffigisinnaallugu assut nuannerpoq, kunngissaq KNR-imut taama oqarpoq.

Periarfissarpassuit

Nittarsaassinermi najuunnermigut aningaasaliisartunut nunatsinni aatsitassarsiornikkut aallartisaasinnaasunut soqutiginnilersitsisinnaassaalluni neriuutigaa. 

- Kalaallit Nunaat nittarsaassinermi maani pitsaasumik saqqumilaartissinnaavara. Kalaallit Nunaata aatsitassarsiornikkut periarfissarpassuaqarnera nunani allani aatsitassarsiornermik suliaqartunut paasitissallugu pingaaruteqarpoq, kunngissaq oqarpoq.

Aatsitassarsiornerulli pinngortitaq, nuannareqisani, ataqqillugu ineriartortinneqarnissaa kunngissap aamma pingaartittupilussuuaa. 

AAMMA ATUARUK Kalaallit Nunaat soqutigineqarunnaariartortoq

- Periarfissarpassuaqarpormi. Malinnaasinnaanissarli pinngortitallu eriaginissaa pingaartuupput. Kalaallit Nunaat eqqarsaatigigaangakku pinngortitap sutigulluunniit atornerlunneqannginnissaa pingaartittupilussuusarpara, kunngissaq erseqqissaavoq.

Aamma kunngissaq ilaqutaalu nunatsinnut qaqugu tikeqqissanersut paaserusunnarpoq. Qaquguli tikikkumaarnersut ullulerneqarsinnaanngikkallarpoq - tikeraartussaallutilli oqaatigaa.

- Ullormik aalajangersimasumik taasaqarsinnaanngilanga. Kalaallilli Nunaat eqqarsaatitsinniittuarpoq, kunngissaq oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat