Erik Jensen aatsitassarsiorneq pillugu - Aatsitassasiornissamut aningaasaliinissaq pilerinarsartariaqarpoq
Aatsitassarsiornermik suliaqartut Kalaallit Nunaanni aatsitassarsiorniarnerup pisariunera allaffissornerullu arriippallaarneranik isornartorsiuinerat naalakkersuisup tusaatissasut tiguaa tamannalu Naalakkersuisuni oqaluuserineqassasoq neriorsuilluni.
Nunarsuarmi tamarmi nunat aatsitassarsiorfigissallugit aningaasaliiffigissallugit soqutigineqarnerit 83-usut akornanni Kalaallit Nunarput 63-itut inissisimasoq, Fraser Institutip nalunaarusiaani nutaanerpaami takuneqarsinnaavoq.
- Sulisitsisut, Naalakkersuisut, Kunngikkormiut, Dansk industri danskillu naalakkersuisui nunatta aningaasalersuisartunut aatsitassarsiortunullu nunarsuarmit tamaneersunut nittarsaannissaanut inuit 70-init amerlanerusut aallartippaat.
- Aningaasaqarneq pillugu Siunnersuisoqatigiit 2018-imut nalunaarusiaat naapertorlugu aatsitassat nunatsinni piiarneqarsinnaasut ilarpassui akitsornissaat naatsorsuutigineqarpoq.
- Suliniutit arlallit ukiuni aggersuni aallartinnissaat naatorsuutigineqarpoq.
- Aatsitassarsiornermut akuersissuterpassuit tunniunneqartut pilersitsisoqarneranik kinguneqassappata, nunatta aningaasaqarneranut iluaqutaallualersinnaapput.
Nunarput 2013-imi soqutigineqarnerpaat 112-usuni qullaseqaluni normu 7-tut inissisimagaluarpoq.
AAMMA ATUARUK Kalaallit Nunaat soqutigineqarunnaariartortoq
Kalaallit Nunaanni aatsitassarsiorniarneq pisariuvoq arriippallaarlunilu. Aatsitassarsiornermik suliaqartut isornartorsiuteqarlutik taama oqarput. Isornartorsiuinerat naalakkersuisunit tusaatissatut tiguneqarpoq.
- Naalakkersuisunit soorunami uuma inerniliussaa tusaatissatut tiguarput, taamaattorli suliassaqartugut erserpoq, taamaattumillu maaniippugut Torontomi annertuumik suliaqarniarluta nittarsaassiniarluta, nunatsinnut aningaasaleerusussuseq soqutiginarsarniarlutigu, Aatsisatassanut Suliffeqarnermullu Naalakkersuisoq Erik Jensen aatsitassanik nittarsaassinermi, PDAC-imi, Torontomi Canadami ulluni makkunani peqataasoq taama oqarpoq.
Aatsitassarsiortut isornartorsiuinerminni allaffissorneq sivisuallaarlunilu ajornakusoortuusoq oqaatigaat.
Allaffissornerullumi eqaannerusumik sukkanerusumillu ingerlatilernissaa, Naalakkersuisut siuliisa sulissutigilersimagaat, maannalu Naalakkersuisuusut ingerlateqqikkaat, naalakkersuisoq oqarpoq.
- Taanna eqqartoqqinniarparput, qanoq iliorluta eqaannerulerseqqinniarlugu, kisianni aamma taassuma pitsanngoriartuleqqissimanera, aamma assigiinngitsut aningaasaliisartut suleqatigisinnaasagullu nassuiaanniarlugit maaniippugut, Aatsitassanut suliffeqarnermullu Naalakkersuisoq Erik Jensen taama oqarpoq.
Aallartitat Naalakkersuisuneersut inuussutissarsiortullu aatsitassarsiornermi suliaqartut aatsitassarsiorneq pillugu Torontomi Canadamiitttumi nittarsaassinersuarmi PDAC-mi maanna peqataapput.
