Avatangiisinut aningaasaateqarfiliornissaq Inatsisartuni amerlanerussuteqartut tapersersorpaat
”Mingutsitsisup akiliisussaaneranut” isuma tunngavigalugu avatangiisinut aningaasaateqarfiliortoqarnissaa Naalakkersuisut kissaatigaat. Nunatsinni peqqinnerulersitsinissamut nunattalu saligaatsuunissaanut suliniutit aningaasaateqarfimmit tapersersorneqassapput.
Siunnersuullu illuatungiliuttunit tunngaviatigut taperserneqartoq, Inatsisartut Eqqissisimatitsinermut
Avatangiisinullu ataatsimiititaliaata isumaliutissiissutaani atuarneqarsinnaavoq.
AAMMA ATUARUK Kalaallit Nunaata eqqagassanik ulorianartunik akiuiniarnera pitsaanerusariaqarpoq
Avatangiisinullu aningaasaateqarfiliornissamik siunnersuut Inatsisartut Eqqissisimatitsinermut Avatangiisinullu ataatsimiititaliaata isumaqatigiissup tapersersorpaa.
Aningaasaateqarfimmit akileeqataaffigineqartartussat tassaapput eqqakkanik ikuallaaviit pitsaanerusut eqqakkanillu immikkoortiterisarneq, biilikut umiarsuillu atorunnaakkat isumannaatsumik iginneqarnissaat kiisalu aalisariartarfinni piniariartarfinnilu saligaatsuutitsinissaq.
Akitsuutinik qaffaanissaq ernumassutigineqartoq
Pilersitsinissarlu tapersersorneqaraluartoq Avatangiisinut aningaasaateqarfiup aningaasalersorneqarnissaa isumaqatigiinngissutaavoq.
Avatangiisinut aningaasaateqarfiup nunatta karsianit avatangiisinullu akitsuutinit aningaasalersorneqarnissaa Naalakkersuisut kissaatigaat.
Nioqqutissat ingerlatallu avatangiisinut peqqissutsimullu akornutaasinnaasut ”mingutsitsisup akiliisussaaneranut” isuma tunngavigalugu akitsuuserneqartassapput.
AAMMA ATUARUK Uuliap kinertup atorneqarnerata inerteqqutaalernissaa naalakkersuisut tapersersoraat
Taamatullu akitsuusersuisoqarneratigut nioqqutissat suut avatangiisinut akornutaasinnaanersut atuisartunit ilisimasaqarfiginerulernissaat aamma siunertaavoq.
Demokraatilli aperigaanni, taakku isumaqarput avatangiisinut nutaamik akitsuusiineq nunatsinni akileraartarnermut akitsuusersuinermullu tamarmiusumut annertusaataassanngitsoq.
Aamma Inuit Ataqatigiit Suleqatigiissitsisullu aningaasaateqarfiup aningaasaataata inuiaqatigiinni suliaqarfinnut aningaasakilliorfiusunut atornagit suliniutinut avatangiisitigut pitsanngorsaatissanut atorneqarnissaat qulakkeeqqaarusuppaat.
Kikkut qanorlu annertutigisumik avatangiisinut akitsuuserneqassanersut Naalakkersuisut inatsisissatut siunnersuummik kingusinnerusukkut saqqummiussippata aatsaat saqqummiunneqarumaartoq, Naalakkersuisut erseqqissaatigaat.
Avatangiisinut aningaasaateqarfiliornissamik siunnersuut Inatsisartuni ataasinngorpat aappassaaneerneqassaaq.
Kisianni Pinngortitamut, Avatangiisinut Ilisimatusarnermullu Naalakkersuisoqarfik naapertorlugu Avatangiisinut Aningaasaateqarfik pillugu inatsisissatut siunnersuut Kalaallit Nunaanni Avatangiisinut Aningaasaateqarfimmut, Namminersorlutik Oqartussat nittartagaanni nassaassaasimasumut, attuumassuteqanngilaq.
