Kattuffiup siulersuisuunerisa siunnersuutigisimanngikkaat siulittaasoq erseqqissaavoq.

Avannaata Qimussersuani ikiortit killilerneqartut

Avannaata Qimussersuani peqataasunut ikiortit amerlanerpaamik pingasuussasut, qimussertartut kattuffiata aalajangerpaa. Ikiortaasartut amerlassusaat siornatigut killeqanngillat.

Nunatsinni qimussimik sukkaniuuttartut sukkaniuutissatillutik qimmilivimminnit aallarfissaminnukarnerminni arlalinnik ikiortilerlutik qimminik tasikumiartarput.

Qimussit sukkaniuunnermi aallarfissamukarnerat qimussertumut avatangiisiinullu unammillernarsinnaasarpoq. Qimmit qimugullutik pangalikkusuinnarsinnaasarmata naalanngilaarsinnaasarlutilluunniit. Sukkaniuuttussaq taamaammat qimmiminik tasikumiartunik ikiorteqartarpoq.

Ikiortilli maanna amerlanerpaamik pingasuunissaat, kattuffiup Ilulissani ataatsimeersuarnermini sapaatit akunnerisa siuliani aalajangerpaa.

- Taava massakkut qaqinneqarpoq taanna. Ilai ataaseq marlunnik ikiortillit ilai qulingajannik qulit angupajaarlugit ikiortillit. Tassani nikigassuk soorunami aamma maluginiarneqarsimavoq, kattuffiup siulittaasua, Mikkel Jeremiassen KNR-mut oqarpoq.

Siulittaasoq: Atugassarititaasut assigiinnerussapput

Sukkaniuuttut assigiinnerusumik atugassaqarlutik pissartanngorniuuttarnissaat ataatsimeersuarnermi peqataasunit 20-it missaanniittunit amerlanerussutillit toqqarpaat. Tamannalumi aalajangersarneqarnikunut aallanut naapertuuttoq siulittaasoq isumaqarpoq.

- Assigiikannernerusumik sukkaniuuttartut atugassaqarnissaat sianigisassatsinnut ilaavoq. Qimmit amerlassusaat killilereernikuuagut ilaalu ilanngullugit. Qamutit naannerpaaffissaat aamma kilometeri isorartussuseq.

Avannaata Qimussersuani qamutit naannerpaamik meterimik ataatsimik centimeterinillu 50-inik takissuseqartussaapput, qimmit amerlanerpaamik aqqaneq-marluusussaallutik sukkaniuuffillu kilometerinik 40-nik isorartussuseqartussaalluni.

Avannaata Qimussersuanut anngunniuunnermi kattuffiup malittarisassai najoqqutarineqartarput, ikiortinillu killiliineq anngunniuunnermi aamma atuuttoq, Mikkel Jeremiassen oqarpoq.

Sukkaniuuttartup nuannarinngikkaa

Aalajangerneq Avannaata Qimussersuani pingasoriarluni ajugaasimasup, Saqqameersup, William Jensenip tupaallaatigaa, isumaqatiginagulu.

- Aallarnialernermi oqilisaaterujussuugamik, taanna assut akueriuminaatsippara sukkaniuunnermut attuumassuteqanngivikkami. Tassami aallariartoraangatta ikiorpatigut, qimmigut pituffimmut pingaangata avataaniilersarput tamarmik. Qimmit kisimik banep iluaniittarput.

Taassuma nuannaartorinnitserpassuani ikiuukkusuttartut maanna qujaannarfigisariaqalissavai.

- Tapersersuingaarlutik ikiortaramitigut, ilaanni qimmera inuup ataatsip, taamatut inissisimalersarpugut. Nammineq piumassutsiminnik ikiuukkusuttut ajattoruminaattaramik. Taamatut inissisimasarpunga aallariartornermi, William Jensen  oqarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat