Avannaata Kommuniani inuttussuseq aallaavigalugu aningaasaliisalersut
Avannaata Kommuniani qinikkat ukiup tullianut sanaartugassanik missingersuusioraangamik illoqarfinni sisamani nunaqarfinnilu 20-t missaanniittuni suliassanik sanaartorneqartariaqartunik pingaarnersiuisarput.
Aappaagummulli missingersuusiornermi tamanna allanngussaaq. Tassa illoqarfiit nunaqarfiillu inuttussusii aallaavigalugit agguaasalissapput.
Avannaata Kommuniani politikerit aappaagu isertitaajumaartussat qanoq atussanerlugit suli aalajanginngillat.
111 millionit koruunit agguassagaat
Sanaartugassanulli aappaagumut missingersuutaagallartut maanna 111 millionit koruuniupput.
Taava taassuma 47 procentia Ilulissanut, taasumalu eqqaani nunaqarfinnut, Ilimanamut, Oqaatsunut, Qeqertamut Saqqamullu aningaasaliissutaassaaq. Tassami Avannaata Kommuniata inuisa 47 procentii taakkunani najugaqarput.
AAMMA ATUARUK Avannaata Kommunia 2022-mi milliardinik isertitaqarnissamik naatsorsuuteqartoq
7 procenti Qaanaamut eqqaanullu, 25 procenti Upernavimmut eqqaanullu 21 procentilu Uummannamut eqqaanullu aningaasaliissutaassaaq.
- Qulakkeerusukkatsigu kommuni tamakkerluni ineriartorfiussasoq. Aammalu qulakkerusukkatsigu piffinni ukiuni tulliuttuni uneqattaanngitsumik, aalajangersimasumik tunngaveqartumik aningaasanik immikkoortitsisoqartassasoq, borgmesteri attaviitsoq, Palle Jerimiassen KNR-mut oqarpoq.
Qaanaamut aningaasaliissuteqarneruneq
Taassuma taama agguaariaaseqalerneq assersuutigalugu Qaanaami ineriartornermut akornutaassangatinngilaa. Qaanaamut 2020-miit 2022-mut 15 millionit koruunit missaat aningaasaliissutaapput. Agguaariaaserlu atulerpat Qaanaami sanaartugassanut 2023-mit 2025-mut aningaasaliissutissat 21 millionit koruuniunissaat borgmesterip naatsorsuutigaa.
- Suliffeqarfiit innuttaasullu naatsorsuutigiuaannarsinnaalissuaat, uagut uani aalajangigarput tunngavigalugu sanaartorneq ukiuni tulliuttuni ataavartumik, uneqattaanngitsumik ingerlassasoq, Palle Jerimiassen oqarpoq.
Periuseq ataavartuunngitsoq
Taamak missingersuusioriaaseqarneq Palle Jerimiassenip, Inuit Ataqatigiit, Atassutip, Naleqqap Demokraatillu kommunimi maanna pissaaneqarneriinnaani atuuppoq. Qinigaaffiullu sinnerani amerlanerussuteqaannassagunik allanngornianngilaat.
- Uaguutillugu allanngornavianngilaq. Taamaattumik taanna qulakkeerinnissutigisinnaavara 2025-p tungaanut una ingerlassooq, Palle Jerimiassen oqarpoq.
