Avannaata Kommunia takornariaqarnermut siunnersuisoqatigiinnik illoqarfinni pilersitsiniartoq
Ilulissani takornarialerinermik suliaqartut pingasunngorpat siullertut naapisinniarneqarput.
Ilulissat takornarianit tikinneqarnerpaajusartoq, piffissami qaninnermi takornariaqarnermut siunnersuisoqatigiinnik pilersitsivigineqarnialersoq, Hans Peter Lennert oqarpoq.
- Siunertaavoq taakkua oqariartuuteqartassasut suna pisariaqartinneqarnersoq. Taamaalillugu aamma takornarialerisut kommuunilu qanimut suleqatigiillutik ilusissaq ilusileriartuaartussaavaat, Inussutissarsiornermut ingerlatsivimmi pisortaq, Hans Peter Lennert taama oqarpoq.
AAMMA ATUARUK Takornariartitsisartut peqatigiiffiata iluliarmiut takornarialerinermi suliassaqartinniasavaat
Avannaata Kommunia Ilulissani takornarialerinermik suliaqartunik pingasunngornermi naapisitsissaaq.
Ilulissanilu ataatsimoorfeqartoqannginnera Suliniummi ataqatigiissaarisup oqaatigaa.
- Takornarialerisorpassuupput maani Ilulissani. Kisianni annerusumik ataatsimoorfeqaratik. Ataatsimoorfeqanngippata uagut pisortaninngaanniit tusaaniarnerput kipiluttunarsinnaavoq. Kisianni ataatsimoorfeqarpata nipi ersarissoq annikikkunikku uagut aamma tusaalluarsinnaalissuagut. Tassa taanna siunertaavoq, suliniummi ataqatigiissaarisoq Konrad Seblon taama oqarpoq.
Avannaata Kommunia pilersinneqanngikkallarmat kommuniusimasumi inuussutissarsiornermut siunnersuisoqatigeeqarpoq. Maannali inuussutissarsiutit aggulullugit siunnersuisooqatigiinnik pilersitsisoqarnialerpoq.
- Taamaattumik uani pingaaruteqarpoq mittarfittaarnissamut atatillugu nukiit aalajangersimasumut sammiveqarnerusut aamma oqariartortittassallutigit. Taamaattumik aggulunnikuuagut, Inussutissarsiornermut ingerlatsivimmi pisortaq, Hans Peter Lennert taama oqarpoq.
AAMMA ATUARUK Avannaata Kommuniata takornariat kommuninut eqqaamiuminut siammarusukkai
Taamaattumillu inuussutissarsiutit assigiiaakannernerusut tunuliaqutaritillugit siunnersuisoqatigiinnik Avannaata Kommunia illoqarfimmini tamani pilersitsiortornialerpoq.
- Nunami inuussutissarsiortut takornarialerisullu ataatsimoornerminni nukik immaqa pitsaanerusoq tunniussassaraluat sakkukillisarnikuuvoq ukua soqutigisaat assigiinngitsuummata, Inussutissarsiornermut ingerlatsivimmi pisortaq, Hans Peter Lennert taama oqarpoq.
Nunami inuussutissarsiuteqartut, takornarialerisut imaanilu inuussutissarsiuteqartut immikkut tamaasa siunnersuisooqatigiinnik upernaaap ingerlanerani pilersitsivigissallugit Avannaata Kommunia pilersaaruteqarpoq.
