Avannaata Kommuniata takornariat kommuninut eqqaamiuminut siammarusukkai

Mittarfittaassat pillugit pilersaarutit arfininngormat isumasioqatigiinnermi ilaatigut Avannaata Kommuniani inuussutissarsiornermi ingerlatsivimmi pisortap peqataaffigaa. Taannali isumaqarpoq Ilulissat kisimiilluni takornarianik sullissisinnaanngitsoq:

- Kommunit eqqaamiugut aamma ineriartortitsivigisariaqarput soorlu Qeqertarsuaq, Qasigiannguit aamma Kangaatsiaq. Tamakkuupput aamma peqataatinnissaat. Taamaaliunngikkutta tikeraartussat pitsaasumik sullinnissaannut aamma periarfissanik pilersitsinngitsoortussaavugut Qeqertarsuup tunua eqqarsaatigalugu, taamaammat kommunit suleqatigisagut qanimut suleqatiginissaat, Avannaata Kommuniani inuussutissarsiornermi ingerlatsivimmi pisortaq, Hans Peter Lennert taama oqarpoq.
 

AAMMA ATUARUK Siunnersuisoqatigiit isumasioqatigiissitsinerat pissarsiffiulluartoq

Naak takornariat Qeqertarsuup tunuanut siammarterneqarnissaat pilersaarutaagaluartoq, Ilulissani akunnittarfinnik amerlanerusunik pilersitsinissaq aamma siunertaavoq.

Pilersaarutilli suli ersarissumik eqqartorneqannginnera Partii Naleqqameersup, Pele Brobergip paatsuunganartippaa:

- Kisianni suli akisinnaanngilaat suniartunuku taakku takornariarpassuit, sumi najugaqarniarpat, Pele Broberg aperivoq.

Avannaata Kommuniani inuussutissarsiornermi ingerlatsivimmi pisortap oqarnera naapertorlugu, kommuni suliassaqarpoq.

- Mittarfik pilersinneqarpat avataaninngaanniit toqqaannaq ornigarneqalertussaavugut. Tassaniipporlu aamma siunissammut isingaluta aamma eqqarsarluta qanoq iliuuseqarnissarput, Hans Peter Lennert KNR-imut taama oqarpoq.

AAMMA ATUARUK Angalatitsisartut mittarfinnut pilersaarut utaqqisimagaat