Vittus Qujaukitsoq: Siunnersuisoqatigiit isumasioqatigiissitsinerat pissarsiffiulluartoq

Mittarfiliornissanut atatillugu misilittakkat siunissamilu pisinnaasut isumasioqatigiissitsinermi saqqummiunneqarmata, aningaasaqarnermut naalakkersuisoq, Vittus Qujaukitsoq pissarsilluarnerarpoq:

- Tassa maannakkumut mittarfissualiortoqarnissaanut atatillugu avataaninngaanniit misilittakkanik aamma siunissami pisinnaasut pillugit eqqarsaatissanik tuniorarneqarpunga, Vittus Qujaukitsoq oqarpoq.

Mittarfiillu sanaartornissaannut suliffissanik pilersitsisoqartussaassammat, Aningaasaqarnermut Naalakkersuisoq isumalluarpoq.

- Aamma naatsorsuutigaara mittarfissualiortiternerit taakku inuussutissarsiutinut siuariartornermut, suliffinnik ataavartunik pilersitsiortornissamut nunamilu suliffinnik nutaanik pilersitsiortornermut tapertaalluarumaartut, Vittus Qujaukitsoq taama oqarpoq.

AAMMA ATUARUK Mittarfittaassat qanoq atorluarneqarsinnaassappat

Nunatsinnit nunatsinnullu silaannakkut angallasseriaaseq 2023-mit allanngortinneqarpat inuussutissarsiornikkut pisinnaasut iliuusissallu pillugit siunissaq pillugu ilisimartusartoq, Uffe Paludan isumasioqatigiittunut saqqummiivoq.

Siunissami periarfissat siooranarsinnaasut oqaluuserineqarnissaat killeqarsinnaasartoq, aningaasaqarnermut naalakkersuisoq oqarpoq.

- Tassa isumaqarpunga pitsaasuusoq taamatut takorluukkersaarutit siunissami susoqarsinnaaneranut, taavalu periarfissat suusinnaaneranut ilaatigut oqariartortoqarnera. Tassami tamatigut periarfissat, siooranartut il.il. pikkoriffigineq-ajorpagut, taamaattumik allatut eqqarsartumik oqariartorfigineqarnerput pitsaasutut isigivara, Aningaasaqarnermut naalakkersuisoq, Vittus Qujaukitsoq, mittarfissat pillugit arfininngornermi isumasioqatigiittoqarnerani KNR-imit  apersorneqarluni taama oqarpoq.

Isumasioqatigiissitsinermi peqataaniartut 141-t nalunaarsimapput.

AAMMA ATUARUK Kalaallit Airportsip Qaqortumi mittarfissap pilersaarusiornera aallartippaa