Avannaata Kommunia Naalakkersuisunut: Illorsuit ammaqqissinnaaneranut periarfissat misissorsigit
Illorsuit ammaqqinnissaanik misissorneqassasut Avannaata Kommuniani kommunalbestyrelsip piumasaraa. Piumasaqaat borgmesterip Naalakkersuisunut apuuppaa.
Illut ajoquteqanngitsut uninngaannartut aserfallassiiginnarnagit iliuuseqartoqartariaqartoq ammaqqinnissaanik misissueqqusisoq Sakio Fleischer oqarpoq.
- Aserfallannginneranni kingusinaartoqannginneranilu periarfissaq ujartorneqartariaqartoq kommunalbestyrelsip ataatsimiinnerani oqariartuutigaarput, Sakio Fleischer oqarpoq. Taanna Avannaata Kommuniani kommunalbestyrelsimi ilaasortaavoq.
AAMMA ATUARUK Qimagussorneqarsimasut peqatigiiffittaartut
Borgmesterip Naalakkersuisunut saaffiginnissuteqarneranik tamanna kinguneqarpoq.
- Illorsuit ammarneqarsinnaanissaanik misissoqqullugu kommunalbestyrelsip Naalakkersuisunut saaffiginnissasunga peqquaanga. Taamalu saaffiginneqqusineq Naalakkersuisunut ingerlannikuuara, Palle Jerimiassen oqarpoq
2017-imi tassaarsuaqarmat nunaqarfiit marluk, Illorsuit Nuugaatsiarlu, inuerutitinneqarput. Nuugaatsiami inuit sisamat tassaarsuaqarnerani ajunaarput.
Illorsuarmiut
Karrat kangerluanni innap tassaarsuaqarnerata kingorna sisooqqissinnaammat nunaqarfiit matuneqarput. Nunaqarfimmiullu illoqarfinnut, soorlu Uummannamut Ilulissanullu, nussortinneqarput.
Illorsuarmiullu nunaqarfimminnut uterusullutik kommunalbestyrelsimut ilaasortanut saaffiginnittarput.
- Taanna sisoriaannartut isikkoqartoq, massakkullu ulorianarnerpaatut inissisimasutut isikkoqartoq, sisusimanerarpaat ilaasalu apparsimanerarlugu, Sakio Fleischer oqarpoq.
AAMMA ATUARUK Illorsuarmiut angerlarusullutik akerliussutsimik takutitsisut
Taamaammat Karrat kangerluani innap misissorneqaqqinnissaa kommunip piumasaraa.
Ukiullu ingerlanerani misissorneqassasoq Palle Jerimiassen Avannaata Kommuniata upalungaarsimanermut pisortaanit ilisimatinneqarpoq.
- Taakkualu (misissuinerit nutaat aaqq.) aalajangiisussaassapput taakkua nunaqarfiit marluk, Illorsuit Nuugaatsiarlu, siunissami qanoq inissisimanissaannut.
Illorsuulli kisimi ammaqqissinnaanissaanik misissueqqusinermut 2017-imi tassaarsuaqarmat innarlerneqarpiarnikuunnginnera peqqutaasoq, siunnersuuteqartut oqarput.
AAMMA ATUARUK Karrat kangerluanni innat sisoorsinnaaneri suli aarlerinaateqartut
Karrat kangerluani innap sisoorsinnaaneranut misissuineq kingulleq 2018-imi decembarip qaammataani pivoq. Innap sisooqqissinnaanera suli aarlerinaqisoq, tassani inerniliussaavoq.
