Karrat kangerluanni innat sisoorsinnaaneri suli aarlerinaateqartut
Karrat kangerluanni sumiiffiit sisoorfiusinnaasutut aarlerinaatillit annertoorujussuarmillu aarlerinaatilittut inissisimasut pingasut sumiissusersineqarput.
Tamatuma kingorna paasineqarpoq Karrat kangerluanni qaqqap innaa sisoorsinnaaneranut suli annertuumik aarlerinaateqartoq.
Nuugaatsiami Illorsuillu kangerluini taakkualu eqqaaniittut aarlerinartorsiorfiusutut suli isigineqartariaqartut Kalaallit Nunaanni Upalungaarsimanermut Ataatsimiititaliap paasisat kingulliit tungaavigalugit naliliipput.
Misissukkat tunngavigalugit Illorsuarmiut Nuugaatsiarmiullu nunaqarfimminnut utertariaqanngitsut, taamatullu aarlerinartorsiorfiup qanittuani angalasoqannginnissaa upalungaarsimasut inassutigaat.
Saqqap eqqaani aamma aarlerinaateqartoq
Nunatsinni allat arlallit aamma misissuiffigineqarput, Saqqallu eqqaaniittumi, Sullorsuup eqqaani qaqqat innaasa ilaat sisoorsinnaaneri annertuumik aarlerinaateqartoq paasineqarpoq. Qaqqallu sisuussagaluarpata Saqqamut eqquisumik tassaarsuaqarsinnaanera aarlerinaateqartoq Danmarkimi Kalaallit Nunaannilu nunap iluani nunat pissusaannik misissuisarfiup nalilerpaa. Saqqamilu najugaqartut qaqqat innaasa sisoorfiusinnaanerat, kingunerisinnaasaannillu kinguarsarneqanngitsumik najugaqartut ilisimatinneqarnissaat kaammattuutigineqarpoq, taamaalilluni najugaqartut namminneq aaliangersinnaaniassammassuk Saqqami najugaqaannassanerlutik.
Saqqami mianersortumik periuseqarnissaq kaammattuutigineqarpoq, tassani immap ulinnerpaaffissaaniitillugu qeqqata killinganit meterinik sisamanik qatsinnerusumi illuni unnuisoqartarnissaa kaammattuutigineqarluni.
Innuttaasut pineqartut ilisimatinneqareersut Danmarkimi Kalaallit Nunaannilu nunap iluani nunat pissusaannik misissuisarfiup nalunaarutigaa, taakkualu erseqqissaapput, uippallernissamut pissutissaqanngitsoq.