Illorsuarmiut angerlarusullutik akerliussutsimik takutitsisut
Illorsuarmiut Karrat kangerluani siorna aasakkut tassaarsuaqarnerata kingorna nunaqarfimminnit qimagutsinneqartut nunaqarfiup uterfiginissaa ulorianaateqarsorinngilaat. Dorthe Qvist Jerimiassen, arfininngormat akerliussutsimik takutitsisoqarneranik aaqqissuisoq taama oqaluttuarpoq.
- Illorsuarmiut massakkut inissisimanertik aallaavigalugu naammagiliivugut angerlarusuppugut, nammineq angerlarsimaffigut najoqqilerusuppagut, ajorterannginnerini angerlarsimaffigut.
AAMMA ATUARUK Qimagutitinneqartuni imigassaq aalakoornartortalik ajornartorsiutaalersimasoq
Tamatumali qanittukkut pinissaa ilimananngilaq. Borgmesterimmi Palle Jeremiassenip oqaatigaa kangerlummi qaqqap sisooqqissinnaanera suli aarlerinaateqartoq.
- Qaqqamut tunngatillugu taakkua ilisimatuut aammalu avataaninngaanniit naliliisartuninngaanniit malinnaaffigineqartuarpoq, aammalu ilisimatuussutsikkut innersuussat pisortatut malittussaavagut. Ilisimatuussutsikkut paasisat malillugit ulorianassuseq suli uuttuutip - 0-iminngaanniit 12-imut atorutsigu - 11,5-imiippoq. Taamaattumik suli pissutsit ulorianartorujuttut ilisimatuussutsikkut paasisanit tunngaveqartillugit, aamma uagut ilisimatuussutsikkut innersuussat malittussaagatsigit tassuunakkut allannguinikuunngilagut, Palle Jeremiassen oqarpoq.
AAMMA ATUARUK Illorsuarni Nuugaatsiamilu atortut avatangiisinut ulorianaatillit salinneqalersut
Nunatsinni Upalungaarsimasuutitat aggustimi ilisimatitsissutigaat Uummannap pigisaani siorna nunaqarfinnik arlalinnik eqquisumik tassaarsuaqarneranut assingusumik qaqqat arlallit sisoorsinnaanerat aarlerinaateqartoq. Borgmesterillu innuttaasut qimagutsinneqartut angerlartissinnaanngilai, immikkulli ilisimasallit sumiiffimmik nakkutilliisut nutaarsiassaateqalerpata ilisimatikkumallugit neriorsuivoq.
AAMMA ATUARUK Illorsuarmiut pigisaat aaneqartut
- Ullut tamaasa malinnaasoqartuarpoq qanoq pisoqarneranik qanorlu nikikkiartorneranik taassuma qaqqap. Taamaattumillu taakkua tunngavigalugit aalajangiinerput ingerlattussaavarput, Avannaata Kommuniani borgmesteri Palle Jeremiassen oqarpoq.
Tamannali naammaginanngitsoq, Dorthe Qvist Jerimiassen isumaqarpoq.
- Taamani pisoqarmat uagut ulorianartorsiornikuunngilagut. Eqqaani piniariarfiit Umiivikkut Nunaviup nunataa piniarniarfittut ammaannikuuaat, soorlu uanga uiga massakkut aallaarpoq umimmanniarluni Illorsuit eqqaanut, Dorthe Qvist Jerimiassen taama oqarpoq.