Avannaata Kommuniani borgmesterip Palle Jeremiassenip Siumumeersup meeqqanut inuusuttunullu ikortariaqartunut pissutsinik qulakkeeriniarnermi ajornartorsiuteqangaatsiartoqartoq nassuerutigaa. Assi: KNR

Avannaata borgmesteria isornartorsiuisoqareersorlu: Sapinngisarput tamaat iliuuseqarpugut

Avannaata Kommuniani isumaginninnikkut sullissisut amerlanerusut, angalasartut ilaqutariinnullu siunnersuineruneq ingerlanneqarput. Meeqqanut ikiortariaqartunut angerlarsimaffiillu avataanut inissinneqarsimasunut tunngatillugu Nakkutilliisunit isornartorsiusoqareersorlu taama pisoqarpoq.

Avannaata Kommuniani borgmesteri, Palle Jeremiassen Siumumeersoq, iggiarlullunilu sinnakinninilu pissutigalugu qasuvoq.

Borgmesteri qineqqusaarnermi kingunerisaanik iggiarluppoq, Namminersorlutik Oqartussallu Nakkutilliisuisa Upernavimmi Ilulissanilu meeqqat ikortariaqartut angerlarsimaffiillu avataanut inissinneqarsimasut atugassarititaannut tunngatillugu isornartorsioreerneratigut sinnakilluni.

Nakkutilliisut nalunaarusiaani, KNR-ip takunniffigisinnaalersimasaani Avannaata Kommunianilu kommunalbestyrelsit tallimanngormat oqallisigisaani isornartorsiuisoqarpoq.

- Sakkortoqaaq aamma atuarlugu alianarpoq. Kommunalbestyrelsit taanna pillugu tallimanngormat ataatsimiinerminni eqqartorpaat. Kommunalbestyrelsit akisussaaffik tiguaat, Palle Jeremiassen oqarpoq, pissutsillu akisussaaffigilluinnarlugit ersarissaalluni.

Borgmesteri: Nalunaarutiginninnerit misissorneqartarput, kisianni....

Nalunaarusiami isornartorsiuinermi Avannaata Kommunia meeqqanut kinguaassiutitigut atornerluinerit kannguttaatsuliornerillu pillugit nalunaaruterpassuarnik – pingaartumik kommunip nunaqarfiinit tigusaqartartoq pingaartumik isornartorsiorneqarpoq.

Nunaqarfimmili innuttaasut nunaqarfinnut assartuinerup amigaataanera pissutigalugu ”sumiginnarneqartartut” Nakkutilliisut allapput. Borgmesterillu angallannermut piareersaanerit aqutsinerillu unammillernartut nassuerutigaa.

AAMMA ATUARUK Avannaata Kommunianut isornartorsiuterujussuit: Ataatsimik ukiulik gonorrértoq

- Kullorsuarmut, Nuussuarmut nunaqarfinnullu allanut toqqaannartumik aqquteqannginnera imminermi unammillernartuuvoq. Piviusorsiussagutta tamanna suli piffissaqarfigineqartariaqarlunilu pissutsit inerisarneqarnissaat pisariaqarpoq, Palle Jeremiassen oqarpoq.

Inunnik isumaginninnikkut misissuisoqarnissaa pisariaqaraangat nalunaaruteqartoqarneranit akunnerit 24-t qaangiutsinngit aalajangerneqarnissaa pisariaqartoq, borgmesteri oqarpoq.

- Meeqqanik atornerluisimanermut tunngasumik suliassamik takkuttoqaraangat politiit ingerlaannartumik attavigisarpagut, sulinerpullu inatsisit malillugit ingerlatilertarlutigu.

Borgmesteri: Ilaqutarsiat akuerisaasut

Taamungaannaq tigooqqaalluni misissorneqartut naapertorlugit meeqqat qassiiusut ilaqutarsiani ilaqutarsiaanissamut akuersissuteqarfigineqanngitsuniittut Nakkutilliisut nalunaarusiaanni aamma erseqqissaatigineqarpoq. Tamannali eqqortuiunngitsoq, Palle Jeremiassen nassuiaavoq.

Pissutsinimi nalunaarusiami eqqaaneqartuni meeqqat pinasuartumik inissinneqarnissaat pisariaqarsimavoq. Taamaakkaluartorli ilaqutariinnut siusinnerusumi ilaqutarsiaanissamut akuersissuteqarfiusimasunut imaluunniit pissutsinik kommunimit akuerineqarsimasunut inissinneqarsimasut borgmesterip oqaatigaa.

- Ilaqutariit inissiiffigineqarniartut inissiiffigissallugit meeqqamut toqqissisimanartuunersoq misissorneqartarsimapput. Meeqqat ukua pitillugit inissiinnarneqartarsimanngillat, aatsaat taamatut pisoqartillugu misissueqqaarnernik pisoqartarsimanera paasissutissiissutigineqarpoq.

Sulisut amerlanerusut qaninnerusumillu suleqatigiinneq

Nakkutilliisoqarfiup Upernavimmi ingerlatsiviup meeqqat inuusuttullu ikortariaqartut inatsit malillugu ikiorneqarnissaat naammattumik tunniussinnaanngikkaa 2018-imi erseqqissaatigaa. Nalunaarusiamilu nutaami Upernavimmi ingerlatsiviup Ilulissanilu qitiusumik ingerlatsiviup akornanni suleqatigiinneq pitsaanngitsoq allassimavoq.

Nakkutilliisoqarfiulli ukiaq tikeraarneranit pitsaanerulertoqarsimasoq, Palle Jeremiassenip oqaatigaa. Ilaatigut ingerlatsiviit taakk marluk akornanni oqarasuaatikkut videokkullullu ulluinnarni maannakkut siunnersuisoqartarpoq suleriaatsillu sukaternerunikuullutik.

Kommunilu sulisunik amerlanerusunik atorfinitsitsileruttorpoq.

Isumaginninnermi angalallutik suliaqartartut marlunnit arfinilinnut amerlineqarnissaat kommunimit aalajangerneqarnikuuvoq, taakkunannga ataaseq maannamut atorfinereerpoq, atuuffiillu pingasut sinneruttut saqqummersinneqarnikuullutik.

AAMMA ATUARUK MIO-p angalanermi nalunaarusiaa: Qeqertalimmi meeqqat innimiilliorfigineqarsimasut illersorniarnerat ajornartorsiutaangaatsiarpoq

Tamatuma saniatigut danskit isumaginninnermi siunnersortit nunap immikkoortuani angalallutik kalaallinut sulisunut sanileralugit ilinniartitsipput. Kommunilu nunatta Danmarkillu 2020-mi suleqatigiissutaat aqqutigalugu Danmarkimit ikiorneqarnissamik aamma qinnuteqarluni.

- Sulisunut ilitsersuisoqaleruttorpoq, ilaqutariinni aqqutissioqatigiinneq aallartinneqarpoq, ilaqutariinnut iluaqutigineqarluartussamik katsorsaasoqarpoq, Upernavimmilu sulisunut pissutsit pitsaanerulersinneqarnissaanut suliniutit qassiiullutik, Palle Jeremiassen oqarpoq.

Taassumali isumaginninnermi suliaqartunik ilinniarsimasunut pilerisaaniarneq ilaatigut akissarsiaqartitsiniarneq, ineqartitsiniarneq sulineruluttoqarneralu pissutigalugit ilungersunangaatsiartoq erseqqissaatigaa.

- Allannguissagutta piffissaq sivisooq atorneqartariaqarpoq, borgmesteri oqarpoq.

Borgmesterip kommuni kisimiilluni kinguaassiutitigut atornerluinernik unitsitsisinnaananilu pinaveersaartitsisinnaanngitsoq erseqqissaatigaa. Tassanilu innuttaasut akornanni ilisimaarittoqarnissaa suleqatigiittoqarnissaalu pisariaqarluinnarluni.

Nakkutilliisunit isornartorsiuinermut akissut pissutsit pillugit nalunaajaat kommunalbestyrelsimi isumaqatigiittoqarluni akuerineqarpoq taannalu Isumaginninnermut inatsiseqarnermullu Naalakkersuisoqarfimmut maanna nassiunneqarsimavoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat