Statsministeri: Atuartut Kalaallit Nunaat pillugu sunik ilinniartinneqassanersut ilinniartitsisut namminneq aalajangissavaat

Danmarkimi inuppassuit Kalaallit Nunaat nutaaliaasoq pillugu ilisimasaqarnerulernissartik pisariaqartippaat.

Tamanna statsministerimit Mette Frederiksenimit (S) aamma Folketingimi ilaasortamit Aaja Chemnitzimit (IA) Folketingimi marlunngornermi akunnermi apeqqarissaarnermi isumaqatigiissutigineqarsinnaavoq. 

 - Isumaqarpunga ilumoortoq, Danmarkimi inupparpassuit Kalaallit Nunaat nutaaliaasoq pillugu paasissutissanik amigaateqarmata, tamatumalu qanoq pissarsiarineqarsinnaanera pillugu ataavartumik oqaluuserisariaqarparput, Mette Frederiksen oqarpoq.

Taama oqarpoq Danmarkimi meeqqat inuusuttullu Kalaallit Nunaat nutaaliaasoq pillugu ilikkarnerunissaat naalakkersuisunit qanoq qulakkeerniarneqarnersoq IA-mit qinikkap apeqqutigimmagu.

Ilisimasaqarnerulernermi isummanik pigiliutiinnakkanik pingaartumik kalaallinit inuusuttunit Danmarkimi misigineqartartunik nungusaaqataasinnaasoq Aaja Chemnitz isumaqarpoq.

- Danmarkimi meeqqat atuarfiini ilinniarnertuunngorniarfinnilu Kalaallit Nunaat nutaaliaasoq annertunerusumik atuartitsissutigineqartalernissaata qulakkeernissaa Inuit Ataqatigiinnit kissaatigeqaarput, akunnermi apeqqarissaarfimmi oqarpoq.

Danmarkimili meeqqat atuarfiini atuartut Kalaallit Nunaat pillugu sunik ilinniartinneqassanersut politikerinit aalajangerneqartussaanngitsoq, Mette Frederiksen oqarpoq.

- Meeqqat atuarfiini aalajangersimasunik sunik atuartitsisoqassanersoq maani Folketingip inersuaani uanga aalajangertussaasorinngilara. 

Folketingimi suleqataasa meeqqat atuarfii pillugit isumaqatigiissuteqaqataasunit  aamma akuliuffigineqartariaqanngitsoq Mette Frederiksen isumaqarpoq.

- Naalakkersuisuni isumaqarpugut meeqqat atuarfiat qimaamilaarneqartariaqartoq, tatigilluinnarparpummi ilinniartitsisut, atuarfimmi siulersuisut, atuarfiup pisortaa, atuartut angajoqqallu najukkani meeqqat atuarfigisatsinnik suliaqarluarnerpaasinnaasut.

Statsministeri: Kalaallit Danmarkimi immikkoortinneqartarput

Statsministerilli kalaallinut Danmarkimiittunut isummanut pigiliutiinnakkanut iliuuseqartoqartariaqarnera nassuerutigaa.

Aamma kalaallinit kingoqqisut amerlanersaat Danmarkimi pitsaasumik inuuneqaraluartut, Mette Frederiksen oqarpoq.

- Aamma immikkoortitsisoqarpoq, pigiliutiinnakkanik isumaqartoqarluni eqqunngitsunillu oqaaseqartoqartarluni. Inuusuttatsinnit oqaatsit maani Folketingip inersuaani oqaatigerusunngisannik allaat tusarneqartarput.

- Tamatuma iliuuseqarfiginissaa kulturillu tamatuma akerlilernissaa ataatsimoorluta akisussaaffigaarput, Mette Frederiksen oqarpoq erseqqissaatigalugulu inuiaassuseq tunngavigalugu immikkoortitsineq inerteqqutaammat.

Folketingi aasaq aalajangiivoq Danmarkimi meeqqat atuarfiini atuartut Kalaallit Nunaata Savalimmiullu naalagaaffeqatigiinni inissisimanerat pillugu oqaluttuarisaanermik atuartitsinermi pinngitsoornatik ilinniartinneqartassasut.

Danmarkimi meeqqat atuarfiini atuartunut Kalaallit Nunaat nutaaliaasoq pillugu atuartitsissutissanik inerisaanissanut Folketingi arlaleriarluni aningaasaliisarsimavoq. Tamanna ilaatigut nittartakkamik dagensgrønland.dk-mik inerneqarpoq, tassani ilinniartitsisut atortussaminnik killeqanngitsumik aallersinnaallutik.