Isumaqatigiissut ukiunik tallimanik pisoqaassusilik: Naalagaaffeqatigiinneq atuartitsissutigineqartalissasoq

Nunatta Danmarkillu akornanni silaannaq maanna naqisimasartoq danskit meeqqat atuarfiini atuartitsinermi immaqa oqinnerulaalersinnaavoq.

Danskit atuarfiini oqaluttuarisaanilerinermik atuartitsinermi naalagaaffeqatigiinneq ilaajuaannalissaaq.

Danskit Meeqqanut Atuartitsinermullu ministereqarfiata naalagaaffeqatigiinnerup oqaluttuarisaanilerinermik atuartitsinermi ukiup atuarfiup tulliata aallartinneranit ilaajuaannartussanngortippaa. Ministereqarfik tusagassiuutinut nalunaarummi marlunngornermi allappoq.

Naalli Danmarkip, Savalimmiut Kalaallit Nunaatalu akornanni oqaluttuarisaanilerineq pillugu atuartitsineq aatsaat pinngitsoornani ilaasussanngoraluartoq atuartitsissutigineqartalernissaa 2019-imili isumaqatigiissutigineqarnikuuvoq.

Atuartut naalagaaffeqatigiinnermut atatillugu ilinniartinneqartussanngornerata saniatigut Holocaust tassa juutinik nungusaaneq pillugu aamma atuartitsisoqartalissaaq.

Sammisat taakku marluk atuarfimmi atuartitsissummi oqaluttuarisaanilerinermi najoqqutassat immikkoortuini katillugit 29-ni ilaatillugit atuartitsissutigineqartalissapput.

- Oqaluttuarisaanilerinermi najoqqutassiortut meeqqat atuarfianni oqaluttuarisaanilerinermi najoqqutassat ”Atlantikup avannaa aamma naalagaaffeqatigiinneq”-mik qulequtalimmik nutaamik immikkoortortaqalernissaat innersuussutigisimagaa, tusagassiuutinut nalunaarummi allassimavoq.

Oqaluttuarisaanilerinermik atuartitsineq ullumikkut pisunik aamma ilaqartoq

Danmarkimi Meeqqanut Atuartitsinermullu ministereqarfiup kanonudvalg 2021-mi juunimi pilersippaa, ataatsimiititaliamit tassannga naalagaaffeqatigiinneq ullumikkumik ukkatarinnittoq oqaluttuarisaanilerinermi najoqqutassasnut qanoq ilanngunneqarsinnaanersoq, taamaalillunilu atuartitsissutigineqarsinnaanersoq innersuussutigisussaavaa.

Ataatsimiititaliaq 2021-p naanerani taamaaliorpoq, innersuussutaalli arlalinnik apeqqusiinissamut pissutissaqalersitsisut, Meeqqanut Atuartitaanermullu ministereqarfik allappoq.

Danskimmi meeqqat atuarfiini atuartut ullumikkut naalagaaffeqatigiinnermik ukkatarinnittumik atuartinneqarnissaat aamma naleqquttuuvoq.

Taamaammat oqaluttuarisaanilerinermik najoqqutassiortut suliaqaqqilernissartik qinnutigaat, sulinerlu 2022-mi ukiakkut aallartillugu.

Suliaqarneq taanna maanna naammassivoq, taamaammallu ilaatigut naalagaaffeqatigiinneq pillugu atuartitsisoqarnissaa piumasaqaataalerluni.

- Kalaallit Nunaata Savalimmiullu naalagaaffeqatiginerat ataatsimut oqaluttuarisaanitsinnik, maannakkut siunissamilu pisussanut ilaangaatsiarpoq, kikkuunitsinnullu nassuiaataalluni. Tamanna meeqqat atuarfianni soorunami atuartitsissutaassaaq, meeqqanut atuartitsinermullu ministeri, Mattias Tesfaye (A) tusagassiuutinut nalunaarummi allappoq.

KNR-ip meeqqanut atuartitsinermullu ministeri oqaaseqartinniarsaraa.