Atuartut efterskolimi inuuneq pillugu ilinniartillugit naapeqatigiissinneqartut
Kalaallinut Danmarkimi efterskolertunut siullerpaamik taamatut aaqqissuussisoqarpoq. Danskit kulturiat, efterskolini assigiinngitsuni suut pisariaqarnersut, qimuttuitsunik bussinillu angalanerit, Mobilepay Danmarkimilu inuusuttuaraaneq pillugit ilinniartinneqarput.
AAMMA ATUARUK Efterskolenetværk sænker frafaldet
Naapeqatigiissitsineq ullunik pingasunik sivisussuseqarpoq, efterskolillu aallartinnissaat sioqqutilaarlugu ingerlanneqarluni. Atuartut Danmarkimi efterskolimi inuuneq pillugu paasissutissiiviginissaannik siunertaqarpoq, taamaaliornikkut aallartikkunik tupaallatsitaannginniassammata, Kalaallit Illuutaat Aarhusimiittoq tusagassiorfinnut nalunaaruteqarluni taama ilisimatitsivoq.
-Naapeqatigiissitsineq tallimanngormat naammassineqartoq peqataaffigineqarluarpoq, taamaammat iliatsilluartutut oqaatigisinnaavarput, Søs Hald Kalaallit Aarhusimi Illuutaanneersoq oqaluttuarpoq, aaqqissuussinerullu aappagu ingerlateqqinneqarnissaa pilersaarutigineqarpoq.
Region Midtjyllandimi efterskolertussat nunatsinneersut ukioq manna 80-iupput, taakkulu efterskolinut 29-nut agguataarsimapput.
AAMMA ATUARUK Atuartut efterskolernissamut piareersarneqartassapput