Doris: Atuartut efterskolernissamut piareersarneqartassapput
Danskit efterskolenit kalaallit meerartaat amerlasuut uniinnartarnerat uggornarpoq. Ilinniartitaanermut naalakkersuisoq Doris Jakobsen Jensen marlunngornermi Qanoruumi taama oqarpoq.
- Soorunami uggornartorujussuuvoq, allat efterskolerusukkaluartut inangiinnarneqartarmata. aamma aningaasarpassuit ilikkagassaraluillu qatangiinnartinneqartarlutik, Doris J. Jensen oqarpoq.
Taama nalunaaruteqartut tassaapput Kalaallit Illuutaat aamma Danmarkimi Efterskolet peqatigiiffiat. Taakku nalunaarput kalaallit ilinniariat danskit efterskoliinukartartut piareersimasanngittut.
Ajornartorsiutigisartagaat amerlaqaat, soorlu qallunaatut oqalussinnaanngingajannerit. Tamakku illinniarnissamut inuuniarnikkullu ajornartorsiutinik pilersitsisarput. Taakku saniatigut kalaallit meerartaat Danmarkimut ukiiartorlutik tikittarput atisanik arlaatassaqaratilluunniit, atuarnermilu atortussaqaratik atuanngiffinniluunniit ilaqutariinnik pulaartagassaqaratik.
AAMMA ATUARUK Kalaallit Danmarkimi efterskolertut aallartinnerluttorpassuusartut
Suliniuteqartoqalersorli Doris Jakobsen Jensen oqarpoq. Soorlu Namminersorlutik Oqartussat Danmarkimi Efterskolet peqatigiiffiat peqatigalugu Danmarkimi kalaallit efterskoleni aallartitsinnagit tammaarsimaaqatigiittarnissaannik pilersaaruteqarput.
- Siunissami efterskoleriartussat introcampertinneqartassapput, efterskolenut pinnginnerminni kultorikkut Danmarkimilu pissutsinut assigiinngitsunut piareersarneqarlutik, Doris J.Jensen oqarpoq.
Naalakkersuisuttaaq uparuarpaa meeqqat danskit efterskoleeni aallartitsinnagit piginnaasaat angusarisimasaallu Namminersorlutik Oqartussat eqiigaffigineqarusariaqaraat.
AAMMA ATUARUK Angajoqqaat atuarfiillu efterskolertussat ajutoortittaraat
Aammalugooq danskit kalaallit aggerfii ilisimaniarlugit efterskoleni ilinniartitsisuusartut Kalaallit Nunaannut tikeraartariaqartaraluarput.
- Ilinniartitsisut qallunaat Nunarput inooriaaserpullu pillugu ilisimasaat killeqartorujussuusut paasitinneqarpugut.
Kalaallit Illuutaannit isornartorsiutigeqarpoq angajoqqaat amerlavallaat atuartut angerlarsileraangasa tunniutiinnajanerat. Tamatuma kingunerikkajuppaa ilinniartut maanaannaq angerlartut sapersinneqartutut misigisarnerat, siunissamullu pilersaaruteqaratik angerlaannarnerat.
Taamaalinerani angajoqqaat malartaasernerusariaqartut, Doris J. Jensen oqarpoq.
- Ilaatigut immaqa angajoqqaat sanngippallaarsinnaasarput, meeraq angerlarserpat nalligalugu namminersluunniit maqaasineq tunngavigalugu angerlartiinnartarlugit. Taamaammat angajoqqaat aamma kaammattuinerusariaqarpugut meeqqatik angerlarserpata qiimmassaanerullutillu tapersersuinerusassasut, Jakobsen oqarpoq.
