Isornartorsiuineq: Angajoqqaat atuarfiillu efterskolertussat ajutoortittaraat
Angajoqqaat, meeqqat atuarfiisa kommunillu meeqqat inuusuttullu Danmarkimut efterskoleriannginneranni atuakkerinermi inooqataanermilu piareersimalluarnissaasa qulakkeernissaat akisussaaffigaat.
- Tamannami angajoqqaat akisussaaffigisussaavaat. Periarfissarpassuuppullu angajoqqaat meeqqat atuarfiini ilinniartitsisunik siunnersorteqarsinnaapput. Isumaginnittoqarfimmit aamma ikiortittoqarsinnaavoq, Københavnimi Kalaallit Illutaanni ilinniartunut siunnersorti, Pia Rosing Heilmann oqarpoq.
Kalaallillu Aalborgimi, Aarhusimi Odensemilu Illuutaanit ilinniartunut siunnersortinit taperserneqarpoq.
- Atuartut Danmarkiliartinnatik danskisut pikkorinnerusariaqarneranut Kalaallit Nunaanni meeqqat atuarfii sukateriffiusariaqarput. Meeqqat atuarfiisa atuartunut sakkussalersuisarnerat naammanngilaq. Isumaginnittoqarfiup meeqqap aallannginnerani ajornartorsiutit paasineq ajorpai, ilinniartunut siunnersorti, Mette Lund oqarpoq.
Kattuffiup ajornartorsiut ukkataraa
Danmarkimi efterskolit kattuffiata nunatsinnit efterskoleriartartut piareersimanngippallaartarnerat uppernarsarpaa.
Ajornartorsiutini kalaallit meerartai atuartinneqarnissamut danskisut piginnaaneqanngitsut amerliartuinnavipput.
Saniatigullu meeqqat ukiumut atuarfiusussamut atortussanik piareersimanngitsorpassuusarput. Ataasiakkaat efterskoli immikkut ittumik tunngaveqartut paasisimaneq ajorpaat soorlu kristumiusut upperisarsiortuusoq atuarnerminniluunniit ilaquttat ornittagassatik sumi najugaqarnersut ilisimaneq ajorlugit.
Ajornartorsiutit Namminersorlutik Oqartussanut 2013-imi nalunaarummi uparuarneqarput. Uani ilaatigut allassimavoq:
”Ersarissivoq kalaallit inuusuttut amerliartuinnartut naammattumik danskit oqaasiinik oqalussinnaanatik efterskolernerullu sumik imaqarneranik piareersimanatik Danmarkimut tikittartut.”
- Aaqqiissuteqarnissami piareersartitsinissaq pingaarnerpaarpaavoq. Kalaalliniit efterskolerneq suunersoq, atuartumut qanoq piumasaqaateqarnersoq piareersarnissarlu pingaarnerpaapput, efterskolit kattuffianni siunnersorti, Maren Ottar Hessener oqarpoq
Kattuffiup kalaallit Danmarkimi efterskolertut efterskolelertussanut siunnersuuteqarnerannik isiginnaagassiiaa 2011-imi saqqummerpoq.
