Qaanaami atuartut angerlarsimaffianni pisortaq: Atuartumik angerlartitsinissaq takorlooruminaatsippara
Ivinnguaq Jensen Ilulissani atuartut angerlarsimaffianiit pilersaaruteqartinnagu angerlartinneqareernerata oqaluttuarereerneraniit, illoqarfinni allani atuartut angerlarsimaffiini qanoq periuseqartoqarnersoq paasiniarlugu KNR-imiit misissuivugut.
Avannaata Kommuniani Inerisaanermut ingerlatsivimmi pisortaq Ane S. Hansen KNR-imit oqaloqatigaarput. Illoqarfinni assigiinngitsuni atuartut angerlarsimaffii immikkut periuseqanngitsut oqaloqatigiinnitsinni oqaatigaa.
KNR-illi misissuineratigut illoqarfinni marlunni immikkut periuseqartoqartoq misissuinerit takutippaat.
Meeqqat ukiuni qulini atuartussaatitaanerat pisussaatitaaffigalugulu pisinnaatitaaffigimmassuk Mads-Ole Kristiansenip angerlartitsiinnarnissaq takorlooruminaatsippaa.
- Taannartaa uanga takorlooruminaatsittorujussuuara angerlartitsisaqattaarniarluta imaluunniit inuussuttunnguanut ajorniarfittut elevhjemmit pilersinneqarnikuunerannut siunertaqanngimmat, taanna oqarpoq nangillunilu:
- Una siunertaagami meeraq nunaqarfigisamini atuarfiup naammassisinnaannginnera peqqutigalugu allatut ajornartumik najugarisani qimallugu illoqarfimmut atuarfini naammassiartortarpaa, taamaattuminguna elevhjemmit pilersinneqarnikuusut. Taamaattumik uanga angerlartitsisaqattaartarneq takorlooruminaatsittorujussuuara, Mads-Ole Kristiansen oqarpoq.
Meeqqanik angerlartitsiinnarneq pisariaqanngitsoq
Naak Ilulissani meeqqat atuartut angerlarsimaffianni najugaqartut malittarisassanik malinninngitsunut angerlartitsinermik kinguneqartitsisinnaasaraluartut, Qaanaami atuartut angerlarsimaffianni ajornartorsiortoqartillugu ineqartunik aqqutissiuussilluarnikkut angajoqqaallu suleqatigilluarneritigut Qaanaami atuartut angerlarsimaffianni pisortap Mads-Ole Kristiansenip angerlartitsisarneq pinaveersaartittarpaa.
Atuartut angerlarsimaffiat pillugu Inatsisartut inatsisaanni allassimavoq meeraq atuartut angerlarsimaffianni najugaqartoq malittarisassanut malinnaaniarnerminik ajornartorsiuteqarpat, unioqqutitsisimappallu sulisunik peqateqarluni tapersersorteqarlunilu qaangiiniarnissaa periarfissaasoq.
Ivinnguaq Jensen akunnerni atuartitsiviusuni takkunneq ajormat atuaqqinnissaanut pilersaaruteqartinnagu Ilulissani atuartut angerlarsimaffianniit nunaqarfigisaminut septembarimi angerlartinneqarpoq. Naak kommuni ataasiinnaagaluartoq Qaanaami Ilulissanilu periutsit assigiinngillat.
Mads-Ole Kristiansenimi Qaanaami atuartut angerlarsimaffianni 2021-mi pisortanngornerminiit meeqqamik suli angerlartitsinikuunani, ajornartorsiortoqalertillugulu meeqqat angajoqqaavi suleqatigalugit aaqqiiniartarlutik oqaatigaa.
-Ajornarsorsiortoqartillugu angajoqqaat ingerlaannartumik sianerfigisarpakka nalunaaquttap qassinngornera apeqqutaatinnagu, aamma nalunngereertarpaat sukkulluunniit attavigineqarsinnaallutik taamaattumik ajornanngitsuaqqamik angajoqqaanut attaveqarnerit aallartittarput, taanna oqarpoq.
Pinaveersaartitsilluni sammisassaqartitsineq
Qaanaami atuartut angerlarsimaffianni perulluliornerit pinaveersaartinniarlugit qaammammut ataasiarlutik utoqqarmik oqaluttuartitsillutik pulaartoqartarput, tamannalu nuannarineqarluartoq taassuma oqaatigaa.
- Qaammammut ataasiarluta pinngitsoorata aqqusaartagaqarpugut, tassa sapaat ataaseq pinngitsoornata fjernsyni qamillugu mobilit qamillugit utoqqarnik aggersaalluta oqaluttuartitsineq ingerlattarparput nuannarineqartaqisumik, taannalu sapinngisarput tamaat aaliangersimasumik aallutarisarparput, Mads-Ole Kristiansen oqarpoq.
Oqaluttuartitsisarnerullu saniatigut niviarsiaqqat nukappiaqqallu atuartut angerlarsimaffianni najugaqartut silami illup iluaniluunniit suliarineqartartunik suliakkerneqarsinnaasarput.
- Silami suliassat nukappiaqqanut suliakkiutigineqartarput, soorlu qimmeqarpugut taakkualu qimminik nerukkaaqataaneq qimmilereqataaneq allanillu angutit suliarisartagaannik silami suliaqartinniarsarisarpagut, taava niviarsiaqqat illup iluani assassugassat allallu pinnguaataasinnaasut sammisamiitinniarsarisarpagut, taanna oqarpoq.
Maleruagassanik malinnittoq ersissutissaqanngilaq
Kinaluunniit maleruagassanik malinnittoq ersissutissaqanngitsoq, Mads-Ole Kristiansenip atuartut angerlarsimaffianni najugaqartunut oqaatigisarpaa.
- Kinaluunniit maleruagassanik malinnittoq malersorneqarnanilu ajortumik pineqarsinnaanngilaq taamaattumik kinaluunniit maleruagassanik malinnittoq ersissutissaqaranilu tujormissutissaqanngilaq. Taanna aallaavigalugu paasigaangamikku tuttartorujussuupput ammarlutillu, taamatut periuseqarnerput malunnartumik iluaqutaasoq malugisarpara.
Tamanna pillugu Avannaata Kommuniani atuarfeqarfinnut pisortaq oqaaseqartinniaraluarparput taannali oqaaseqarusunngilaq.