Atuarfiup pisortaa: Atuartut atualernissata kinguaattoornera ukiup atuarfiusup sinnerani atuanngiffinnut sunniuteqassaaq

Angajoqqaarpassuit sulinngiffeqarnertik angalanissartillu atuarfinni atuanngiffeqarnermut ukiut tamaasa piffissami aalajangersimasumi pisaraluartumut naleqqussartarpaat.

Nuummili atuarfimmi nutaami Atuarfik Inussummi aggustimi atualertussanut 1000-it missaanniittunut ukiumi atuarfiusumi aggersumi atuanngiffiit nalinginnaasumit sivikinnerussapput. Tassani juullernerani, aappaagu aasaanerani immaqalu ukiakkut atuanngiffiit pineqarput.

Sanaartugassanik suliassinneqartartut suli naammassinngimmata, atuarfillu kommunimut suli tunniunneqarsinnaanngimmat, atuartut aggustimimi atualernissaat ullunik 14-inik kinguaattoorpoq.

Inatsisit atuuttut naapertorlugit Kalaallit Nunaani meeqqat atuarfiini atuartut tamarmik ukiup ataatsip ingerlanerani ullut 200-it atuartinneqassapput, atuanngiffeqarfiillu sapaatit akunneri marluk piffissami allami inissinneqassallutik. Atuarfik Inussummi atuarfiup pisortaa KNR-mut taama nassuiaavoq.

- Ukiumut atuarfiussussat ullut 200-t piffissanut allanut nuunneqarpata, atuanngiffiusussat sivikinnerulissammata tamanna pissusissamisoorpoq, Uffe Lilholm oqarpoq.

Ukiumi tulliuttumi atuarfiusussami atuanngiffeqarfissat nutaat atuarfiup saqqummiuppai. Tassani juullikkunni aappagulu 2025-mi atuanngiffeqarnissat sivikinnerulersinnaapput, soorluttaaq ukiakkut atuanngiffeqarnissat aamma eqqorneqarsinnaasut, Atuarfiup pisortaa oqaluttuarpoq.

Atuarfiup siulersuisui immikkut ittumik ataatsimiigiaqqullugit aggutsip aallartisimalernerani aggersarneqassapput, pilersaarutit inissinneqarniassammata.

Aasaanerani atuanngiffeqarnermi paarsisarneq

Atuarfiusup sinnerani atuanngiffeqarnerit sivikinnerunerat uggorineqarsinnaanerata saniatigut, ilaqutariinnut meerartalinnut immikkut ittummik inissisimalersitsissaaq, tassami pilersaarutigineqartutut meeqqat aggutsip 15-anni atualernavianngimmata.

- Tamanna pillugu atuarfimmi siulersuisut sulisullu  oqaluuserissavagut. Tamanna qanorpiaq inississanerlutigu oqaluuserissagatsigu. Aaqqiissutissat ajunngitsut nassaarinissaannut ataatsimoortariaqarpugut, atuarfiup pisortaa Uffe Lilholm oqarpoq. 

- Atuarfiup illutaata atulersinnaannginneranut allannguisinnaanngilagut. Pissutsilli taamaannerani ataatsimoorluta aaqqiissutaasinnaasunik ajunnginnerpaanik nassaartariaqarpugut, Uffe Lilhom oqarpoq.

Atuanngiffeqarnerup sivitsorneqarnerani atuareernerup kingorna orninneqartartut, Atuarfinni Ukaliusamut aamma Atuarfik Samuel Kleinschmidtimut atasut meeqqanut aasarnerani atuanngiffeqartunut ammatinneqarnissaat Kommuneqarfik Sermersuup qulakkeerpaa.

Sanaartortut ullormut akiligassinneqartassasut

Sunaqqissaaq ajortoorsimanersoq, sanaartugassanillu suliassinneqartartut atuarfittaami suna suli naammassinnginneraat pillugu apeqqutit Uffe Lilholmip akisinnaanngilai.

- Sunaqqissaaq suli amigaataanersoq ilisimavinngilara. Kisianni arlaliusoraakka. Sulili atulersinnaanngitsoq oqaatigisinnaavara, taanna oqarpoq.

Sanaartugassanillu suliassinneqartartunut kinguneqassaaq. Ullormummi akiliisitaasassasut, atuarfiup pisortaata erseqqissaatigaa.

- Qularnanngitsumik taamaattoqassaaq. Soorunami aamma taakkununnga akeqarpoq. Meeqqalli 1000-it atuariartorsinnaannginnerat uatsinnut ajornartosiutaavoq. Pilersaarutit malillugit 1. klassini atualertussat aggustip ulluisa 15-ianni atualertussaagaluarput, tamatumunngalu atatillugu pilersaarusiortoqartorujussuugaluarpoq. Meeqqalli aatsaat aggustip ulluisa 29-anni atualersinnaapput. Tamatumalu suliami matumani ajornerpaartaraa.

Atuarfik nutaaq Atuarfik Inussuk Nuummi atuarfinnut marlunnut Atuarfik Ukaliusamut (USK-imut), Atuarfik Samuel Kleinschmidtimullu (ASK-imut) taartissatut sananeqarpoq, atuarfiimmi marluk taakku aserfallassimaqalutillu pisoqalimmata.