Atornerluinermut katsorsartinneq akeqartarunnaassaaq
Peqqissutsimut Naalakkersuisup Martha Lund Olsenip tusagassiortunut katersuutsisigami atornerluinermut katsorsartinnissamut pilersaarutit ullumi saqqummiuppai.
Taassuma pilersaarutigaa kommuunini sisamaasuni akeqanngitsumik atornerluinermut katsorsaaveqalissasoq.
Pitsanngorsaaneq naleqarpoq
Atornerluisut ikiorneqarnissaminnut neqeroorfigitittarnerat annikippallaarpoq katsorsartinniartu sivisuallaamik utaqqisinnaasarput, taamaattumik kommuunini akeqanngitsumik katsorsaaveqalissasoq Martha lund olsen pilersaaruteqarpoq.
- Soorunami taamatut akeqanngitsumik neqerooruteqarsinnaaneq katsorsaanermilu pitsanngorsaaneq naleqarpoq akeqaqarlunilu. Aningaasat ikittuinnaanngillat taamatut siunnerfigisagut. Taamaattumik maanna saqqummiupparput aamma inuiaqatigiit oqalliseqataanissaat pingaartillugu aammalu neqoroorutigut qanoq isikkoqarnersut saqqummiullugit inuiaqatigiillu taamaasillutik isummaminnik saqqummiussisinnaallutik.
Akeqanngitsumik katsorsartittoqarsinnaalissaaq, kisiannili ukiunut arlalinnut atuuttussamik aningaasalersorneqanngilaq. Pilersaarusiaq ukioq mannamut taamaallaat atuuttusatut pilersaarutigineqarpoq.
Pilersaarusiaq suli aningaasalersorneqanngilaq
Naak pilersaarusiaq partiinit allanit isumaqatigineqaraluartoq, aningaasalersorneqarsimannginnera iluaagineqarpoq.
Anthon Frederiksen Naleraqqameersoq isumaqarpoq pilersaarut piviusunngortissagaanni kommuunit qanimut suleqatigineqassasut, aammalu pilersaarut aningaasalersortariaqassasoq.
- Pissusissamisoornerpaassagaluarpoq aningaasartassai aamma qulakkeereerlugit inissitsereerlugillu suliaq saqqummiunneqartuuppat.
Inuit Ataqatigiinneersoq Juliane Henningsen isumaqarpoq aningaasalernissaa aamma qulakkeeqqaarneqassasoq piviusunngortinniaraanni.
- Paasinarsissooq una piviusunnguissanersoq kommuunit pineqartut suliniutigeriingaat isiginiartariaqarpagut aammalu pisariaqartitsineq tassaniittoq annertummat taammaammat aningaasartalernissaa qulakkiingassaavoq.
Demokraatineersup Tillie Martinussenip pilersaarusiaq kusagilluinnarpaa sumili aningaasat aaneqassanersut kommuunit peqatigalugit eqqartoqqaartariaqaraat taanna isumaqarpoq.
- Pilersaarutip uuma ajoqutigisinnaasaa tassaavoq sumi aningaasat aassanerigut. Kommuunit peqatigalugut aningaasaliinissammut oqaloqatigissagigut isumaqarpunga aamma aningaasanik peqqinnissaqarfiup iluani ilaqutariinnerullu iluani aallersinnaassaagut, Tillie Martinussen oqarpoq.
Aningaasat atorsimanngisat atorneqassapput
Aappaagumiit ukiut tamaasa 20 millioner koruuninik katsorsartinneq akeqassaaq, aningaasallu peqqinnissap iluani aaneqassanngitsut peqqissutsimut naalakkersuisup oqaatigaa.
Pilersaarusiaq akuerineqassappat aningaasat aaqqissuusseqqinnerminngaanniit aammalu 2014-imi aningaasat atorsimanngisat pilersaarusiamut atorneqassapput.