Atorfillit pissaaneqarpallaarmata Greenland Express uninngatinneqarpoq
Billundip kangerlussuullu akornanni Greenland Expressip timmisartuussinissaminnut qinnuteqaataata suliarinera ajalusoorpoq. Nittartakkap Check-in.dk taama allappoq.
Pilersaarutit malillugit Greenland Express maajip aqqarnani aallartittussaagaluarpoq, tamannalu piviusunngussanngitsoq sapaatit akunnerit marluk qaangiummata nalunaarutigaat.
Akisussaaffik ingerlateqqinneqarpoq
Timmisartuutileqatigiiffiullu piginnittuata Gert Braskip Danmarkimi angallannermut qullersaqarfiup arriippallaamik sullissinerat pisuutippaa.
Taamatulli oqarnera Angallannermut Qullersaqarfiup ataasinngormat Check-in.dk-mut tunuartippaat. Angallannermullu Qullersaqarfik ingerlaqqissagunik Namminersorlutik Oqartussanit oqaaseqaat nassiunneqartussaq amigaatiginerarpaat.
Aamma atuaruk Greenland Express aallartissinnaanngikkallarpoq
- Namminersorlutik Oqartussat uani suliami taamaaliorsimanngillat, Angallannermummi Qullersaqarfiup pisortatigoortumik aatsaat apriilip 17-nni taakkunani paasitinneqarput, Angallannermut Qullersaqarfimmi timmisartuussinermut tunngasunut immikkoortortaqarfiani aqutsisoq Per Schmock, Check-in.dk-mut taama oqarpoq.
Danmarkimi Angallannermut Qullersaqarfik pisuutinneqarpoq
Siunnersortaaneq Lene Riis Attaveqarnermut pisortaqarfimmeersup suliaq allarluinnarmik isigaa.
Taanna nutaarsiassaqartitsivimmut nassuiaavoq namminersorlutik oqartussanut angallannermullu aqutsisoqarfimmut februaarip 19-nni 2015 Gert Braskip qinnuteqaatini nassiukkai.
- Taassuma saniatigut Namminersorlutik Oqartussaq Angallannermullu Qullersaqarfiup qinnuteqaammut tunngasumut Gert Braskimiit apeqquteqaammik tigusaqarput. Taamaattumik ilumuunngilaq Angallannermut Qullersaqarfiup suliaq pillugu aatsaat apriilip 17-nni paasisaqarsimanerat, Lene Riis oqarpoq.
Aamma atuaruk Greenland Express maajip aqqarnganit timmisartuusseqqilissaaq
Aamma atuaruk Greenland Express nunatta iluani timmisartuussisinnaanngortoq
Lene Riisip nassuiarpaa, Angallannermut Qullersaqarfiup Namminersorlutik Oqartussanit suliamut tunngasunik pissarseqqaarlutik aatsaat suliaq aallartissagaat ileqqorineqanngitsoq. Taamaattumik taanna isumaqarpoq, Angallannermut Qullersaqarfiup Greenland Expressimiit qinnuteqaat februaarimiilli misissorlugu aallartissinnaagaluartut.
Angallannermut Qullersaqarfiup qinnuteqaat misissorlugu aallartereerput.
