Atassutip AG naveerpaa

Demokraatit Atassutikkullu ullumikkut inissisimanerat AG-p pingaarnertut allaaserisaa, Atassutip siulittaasuata, Gerhardt Petersenip ajortitsiniaanertut oqaatigaa.

- Atassutip Nunatsinni naalakkersuinikkut sumi inissisimaneranik, AG paatsiveqanngitsumik pisuutitsivoq, tusagassiutinut nalunaarummini, Gerhardt Petersen allappoq naqissuserlugulu, AG-p Atassut ajortisaarlugu allaaserisaqarmat.

AG-p ilaatigut isornartorsiuilluni allaaseraa, Atassutip politikkikkut anguniakkaminnik illersuisinnaanertik ajornartorsiutigigaat.

- Atassut anguniakkamini Naalagaaffeqatigiinnerup attatiinnarneqarnissaanik nukittorsarneqarnissaanillu kissaammik sakkortuumik ersersitsivoq. Isuma tamanna isumaqatigineqarsinnaavoq isumaqatigineqarsinnaananiluunniit. Kisianni piffissami naalakkersuisooqatigisap, Siumup namminiilivinnissap qanoq pingaaruteqartigineranik ersersitseqattaarfigisaani, ilisimatusartullu nalunaarusiaani nutaami »Kalaallit Nunaannut Iluaqutissaaqqullugu«-mi, Naalagaaffeqatigiinnermi suleqatigiinneq nukittorsarneqarpat, Kalaallit Nunaannut iluaqutissarpassuanngortussat tikkuartorneqarfigisaanni, Atassutip qanoq nipaatsiginera tupinnaannarpoq, AG allappoq imalu apeqquseeqqilluni:

- Tamatumunnga partiip aqutsisuisa Naalagaaffeqatigiinnerup nukittorsarneqarnissaanik partiitut namminerisamik anguniakkanut tunuliaqutaajunnaarsimanerat pissutaava? Tamatumunnga partiip aqutsisuisa, Aleqa Hammondimut isornartorsiuinissamut piumannginnerat sapiissuseqannginneralluunniit pissutaava? Qinersisartut imminnut aperissappat, Atassutip nalaatigut krydsiliigaanni partii taasaq sorpiaanersoq?, AG apeqqusiivoq.

Tamatumunnga Gerhardt Petersen ima akivoq.

- Partiitut aallartinnermi anguniagarineqarsimasut uninngaffigerusaassagigut takorluuineruvoq piviusorsiunngitsoq, soorunami partiitut ineriartorpugut, Atassutip siulittaasua allappoq.

Kalaallit Nunanni tusagassiorfiit tamaasa, Gerhardt Petersenip naggataatigut qinnugivigai oqarluni, suliassaminnut naleqquttumik inerisimassutsimillu aallaaveqartaqqullugit, qinersisartullu isummersuutaat tusagassiorfinnit ataqqineqartariaqartut oqaatigalugu.

- Oqartussaaffinnik tigumminnittut ataasiinnaapput, tassalu qinersisartut, taakkulu Kalaallit Nunatta qanoq ineriartornissaanik piumasaqaataat aallaavigalugit uangut sulivugut suliuassallutalu.

Atassutip siulittaasua Gerhardt Petersen taama naggasiivoq.