Atassut taarsigassaqartoq
Atassutip ukioq anigorpaa 55.000 koruuniuteqarluni. Taamatulli uninngasuuteqarnerup partiip akiligassarilersimasaanut 1,3 millionit koruuninut matussusiisinnaanngilaq.
Taamaattumik Atassutip akiligassaqarfimmi saammaassinerat atorluartariaqarpaa, ukiunilu aggersuni ileqqaarnerusariaqarluni.
Partii qinersisikilligaluttuinnartillugu aamma pisortat tapiissutaat ikiliartorput, partiillu ilaasortai ingerlatsinermut annikittuinnarmik tapiisarlutik. Ilaasortat akiliutaat siorna 2.000 koruuniusimapput.
Kukkunersiuisartup naalagaaffimmit akuerisaasup Deloittep erseqqissarpaa, partiimi allaffeqarfimmiut ikittuinnaanerisa atornerluinissamut periarfissat annertusitikkai.
Aamma atuaruk Inuit Ataqatigiit suli akiligassaqartut
Kukkunersiuisulli erseqqissarpaa kukkunernik peqquserluutinilluunniit takusaqarsimanani, Atassutillu aqutsisuisa peqquserluttoqarsinnaanera anninikittutut nalilerpaat.
Partiilli peqquserluttuliornerit takornartarinngilai. Naatsorsuutit allassimaffiini takuneqarsinnaavoq, partiip allatsigisimasaa 2007-imi isumaqatigineqarsimasoq 141.000 koruunit partiimut utertissagai.
Partiip allatsigisimasaata 2014-imi akiligassat siulliit akilersimanngimmagit akiliisitsiniartartunut ingerlateqqinneqarsimavoq. Akiligassaalu maanna 120.000 koruuniupput.