Inuit Ataqatigiit suli akiligassaqartut
2015-imi 266.000 koruuninik sinneqartooruteqaraluarpoq, aningaasalli taakku partiip akiligassaqarfigisaanut tunniunneqarput. Inuit Ataqatigiimmi ukiuni siuliini aningaasanik atuivallaartarsimanini suli akilersorpaa, ukioq mannalu sinneqartooruteqaraluarluni suli 1,6 millionit koruuninik akiitsoqarluni.
Partiip taama akiitsoqatiginera kukkunersiuisunit naalagaaffimmit akuerisanit Deloittemeersunit aamma uparuarneqarpoq.
- Taarsigassarsitsisartut avataaneersut aningaasanik pisariaqartinneqartunik, ilaatigut ingerlaavartumik ingerlatsinermut atugassanik taarsigassarsiaqartitsinerat suli isumalluutigineqarpoq, kukkunersiuisut taama allapput.
Aamma atuaruk IA partiini akiligassaqarnersaavoq
Inuit Ataqatigiinni suliaqarfiit avissaarsimatinneqannginnerat aamma kukkunersiuisunit uparuarneqarpoq, tamanna peqquserluttuliortoqaratarsinnaaneranik qaninnerulersitsimmat.
Partiip naatsorsuuserisuata aaqqissuussaanermi naatsorsuutinut tunngasut amerlanersaannik isumagisaqarnera, aamma peqatigiiffiup siulittaasuata aningaaserisuunerullu partiip aningaaserivimmi kontuinut kisimiillutik piginnaatitaarnerat ajornartorsiutitut tikkuarneqarpoq.
Kukkunersiuinermi peqqusersusaartoqarsimaneranut takussutaasinnaasunik tigussaasunik nassaartoqarsimanngitsoq Deloittep erseqqissaatigaa, suliaqarfinnilli avissaarsimatitsinissaq aaqqissuussaanerup iluani nammineerluni nakkutilliinermi naliginnaasuusoq oqaatigalugu.
