Atassut: IA'p Siumullu isumaqatigiinngissutaasa ineriartorneq kinguarsarsimavaat

Nunatsinni politikkikkut pisut kingulliit eqqarsaatigalugit, allattarfissuaq saleriarlugu nutaamik aallartittoqartariaqartoq, Atassutip siulittaasuata nutaap, Knud Kristiansenip kaammattuutigaa.
Knud Kristiansen, Atassutip siulittaasua. Assi © : KNR
oktobarip 28-at 2014 15:14

Tusagassiutinut nalunaarummini takisuumi, Atassutip ukiuni tulliuttuni politikkikkut anguniagassai, Knud Kristiansenip allaaserai.

Partiilli angisuut marluk, Siumut Inuit Ataqatigiillu ukiuni kingullerni assortuuttuarnerisa, Nunatta siuariartornera unitsissimagaat, Knud Kristiansenip siullermik isornartorsiorpaa.

- Inuiaqatigiittut annertunerusumik ineriartorfigisassaraluatsinni, partiit saamerlertut imminnut isigisut, IA aamma Siumut, akunnerminni pissaaneqarniunnerat, aporaattarnerat naalakkersuinikkullu apeqqutini pingaarutilinni naapiffeqanngilluinnartarnerisa pilersitaanik Nunarput kinguarsarneqartuarsimavoq, Knud Kristiansen allakkamini isornartorsiuivoq.

Aamma atuaruk Atassutip Inuusuttaasa qineqqusaartitassai 

Taassuma aamma oqaatigaa, Atassutip pingaartimmagu, patajaassuseq, aalajaassuseq aamma tunniusimalluni suliumassuseqarneq, minnerunngitsumillu partiit anguniagaat assigiinngittaraluartut eqqarsaatigalugit, naaperiaarusussuseqarluni suleqatigiissinnaanermik Atassut neqerooruteqarsinnaasoq oqaatigalugu.

Namminersorlutik Oqartussat kommunillu pitsaanerusumik suleqatigiinnissaat, Knud Kristiansenip kaammattuutigaa. Aamma oqaatigalugu Nunatta karsiata isertitai aningaasartuutaalu oqimaaqatigiissasut.

Siunissaq eqqarsaatigalugu Atassut aningaasaliinissanut nangianngitsoq, Knud Kristiansen allapoq aamma suliassanut angisoorsuarnut avataaniit aningaasaleerusuttut Atassutip ammaffigai, Knud Kristiansenip erseqqissaatigaa.

- Ataatsimiititaliat suleqatigiissitallu annertuunik suliaqartarnerisgut maannamut sakkussanik anneruunik peqarpugut, taamaattumik naalakkersuinikkut aalajangeersaaqatigiinnissamut piumassuseqarnissaq apeqqutaaginnarpoq, Knud Kristiansen allakkami erseqissaavoq.

Aamma atuaruk Atassutip isumaa allanngortoq

Tamakku anguneqassappata, tassa Atassutip siunnersuutigaa, allattarfissuaq saleriarlugu nutaamik aallartinnermi partiit akornanni nukittuneqqusaannerit qimanneqartariaqartut.