Ataatsimiititaliaq tunniutiinnarpoq: Imerniartarfik ammasarfitoqqani atorlugit ingerlaannassaaq
Kommuneqarfik Sermersuumi aningaasaqarnermut inuussutissarsiornermullu ataatsimiititaliap Tasiilami imerniartarfiup - Arctic Wonderland Diskotek og Kroestuep - sivikinnerusumik ammasalernissaanut septembarip 25-ani aalajangernini marlunngornermi allanngortippaa.
Tamanna piginnittumit, Tasiilami innuttaasunit kiisalu kommunalbestyrelsimi ilaasortamit aalajangernermut siullermut sakkortuumik isornartorsiuisoqareersorlu pivoq.
- Isumaqarpunga ataatsimeeqqittoqarnera eqqortuusoq, taamaaliornikkummi Tunumiunik immikkoortitsisoqaranilu naqissusiisoqanngilaq, Mike Nicolaisen, Arctic Wonderland Diskotek og Krostue piginnittoq oqarpoq.
AAMMA ATUARUK Borgmesteri: Imigassallersinnaanermut akuersissut nalilersoqqilerparput
Mike Nicolaisenip kommuunip aalajangiinermini siullermi tunngavilersuutai paasiuminaatsinnikuuai politiinut suliakkiut tunuartinneqarnikuummat.
Pasilliutaasummi tunngavissaqanngitsut nalilerneqarnikuupput.
Imerniartarfiillu sivikinnerusumik ammasalernissaraluannut aalajangernerigaluaq arlalinnit isornartorsiorneqarpoq. Ilaatigut innuttaasunit marlunnit. Taakkua atsiornernik katersititsiniarlutik aalajangeraluarput, kommuunilli suliaq qaqeqqittussanngormagu atsiornernik katersinissaq unitsiinnarneqarpoq.
- Suliaq Tasiilamut pingaaruteqarluinnartoq qaqinneqaqqimmat nuannaarutigaara. Tamatumami takutippaa qanimut oqartussaaqataaneq atuuttoq. Aammalu una pisoq pimoorunneqartoq. Aamma kommuunip tungaanit, Justus Hansen, Kommuneqarfik Sermersuumi Demokraatit sinnerlugit ilaasortaatitaasut aappaat oqarpoq. Taassuma imigassallersinnaanermut qinnuteqaat siullermeerluni suliarineqarmat ammasarfiit sivikillineqarnissaannut akerliuvoq.
AAMMA ATUARUK Tasiilaq: Imerniartarfiutillip kommuuni suliassanngortikkusukkaa
Mike Nicolaisenip imigassallersinnaanermut akuersissutip suliarineqarnerani ammasarfiit sivikinnerusut atuutsinngilai.
Kommuneqarfik Sermersuumi ataatsimiititaliap aalajangernerminik sapaatip akunneri marlupajaat qaangiunnerini allannguinera pillugu borgmesteri oqaaseqartissinnaasimanngilarput.
