Tasiilami imerniartarfik unnup qeqqata tungaanuinnaq ammaqqusaalerpoq.Assi: Arctic Wonderland Diskotek og krostue

Tasiilaq: Imerniartarfiutillip kommuuni suliassanngortikkusukkaa

Tasiilami imerniartarfik unnuap qeqqata tungaanuinnaq ammatinneqartassaaq. Taama Kommuneqarfik Sermersuumi aningaasaqarnermut inuussutissarsiornermullu ataatsimiititaliaq aalajangerpoq.

Matoreernerup kingorna imigassamik tuniniaanerit, aalakoortunut sassaalliinerit, imerniartarfimmiittut naammaginanngitsumik nakkutigineqartarnerat kiisalu aporaattoqartillugu naammaginanngitsumik isumaginnittoqartarnera.  

Tassa tamakkuupput politiinut ilaatigut tusarniaareernermi akissutigineqartut Kommuneqarfik Sermersuumi aningaasaqarnermut inuussutissarsiornermullu ataatsimiititaliap, Tasiilami imerniartarfiup - Arctic Wonderland Diskotek og krostuep - unnuap qeqqata tungaanut ammatinneqartarnissaanut aalajangernerminni toqqammavilersuutaat.

Malersuinerusoq isumaqartoq

Imerniartarfik pineqartoq siorna juulip aallaqqaataaniit juulip naaneranut imigassallersinaanerminut akuersissutaatiminik arsaarallarneqarpoq. Tamanna Tasiilami politiit Kommuneqarfik Sermersuumut pissutsinik isorisaqarlutik nalunaaruteqareernerisa kingorna pivoq. Politiilli suliaq
tunngavissaqanngitsutut nalilerlugu kingusinnerusukkut unitsippaat.

AAMMA ATUARUK Imigassamut inatsisip Tasiilami malinneqarnera equngasortaqartoq

Taamaammat imerniartarfimmik piginittup, Mike Nicolaisenip,
kommuunip ammasarfinnik sivikilliliinialernera maanna paasimiunaatsippaa.

- Uannut suliffeqarfinnillu malersuinertut maanna killiffeqarpoq, Mike Nicolaisen oqarpoq.

Inatsileritooq: Aporaannerit silataani pisarput

Pissutsilli imigassallersinnaanermut akuersissutip arsaarinnissutigineqarallarneranut sanilliullugu pitsanngortinneqarsimanngitsutut inerniliunneqaruminaatsinneqarput.

Taama inatsileritooq Kommuuneqarfik Sermersuumit suliamik misissuitinneqarsimasoq naliliivoq.

Apooraannerillu imerniartarfiup silataani pisartut, taakkualu aamma inuit ataasiakkaat akornanni pisartut, inatsilerituup aamma nalilerpaa.

- Nuummiikkuit qanorsuaq iliuuseqarsinnaavutit. Kisianni Tasiilamiikkutta taama inersimarpasitsiginngilagut. Uatsinnut paarisinnaanngilagut. Taamaammat unnuap qeqqanut matutinniarneqartalernerput tamaani ajornartorsiutigisatta anigorniarnissaannut aqqutissaanngilaq, Mike Nicolaisen oqarpoq.

Akuersissut ukiumut ataatsimut atuuttoq

Taamaammat imerniartarfiutilik Kommuneqarfik Sermersuumit taarsiivigineqarnissamut suliassamik aallartitsissanerluni maanna eqqarsaatersuuteqalerpoq.

- Tullinnguullugu misissorusutara tassaavoq aalajangerneq atuutsiinnarniarneqarnersoq imaluunniit allanngortinniarneqarnersoq. Allanngortinneqanngippat kommuunit taarsiiffigineqarnissara isumaliutersuutigaara.Mike Nicolaisen oqarpoq.

Kommuneqarfik Sermersuumi aningaasaqarnermut inuussutissarsiornermullu ataatsimiititaliap Arctic Wonderland Diskotek og krostuep unnuap qeqqanut matusalernissaanut aalajangernermi saniatigut imerniartarfik imigassallersinnaanermut akuersissummik ukiunut pingasunut atuuttussamik tuninagu, ukiumi ataatsimi atuuttussamik tunivaa. Taamaaliornikkut piginnittumit sassaallertarfimmi eqqissiviilliornerit
killilersimaarnissaat aqunneqarsinnaanerulissasoq neriuutigineqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat