Nakkutilliinermit nalunaarusiaq Imigassamut inatsisip Tasiilami malinneqarnera equngasortaqartoq

Imigassamut inatsisip Tasiilami eqqortinneqarneranik nalunaarusiap annertuumik isornartorsiuiffiusup pitsaassusia Tasiilami imerniartarfiutillit ilaata qularnartoqartippaa. Isornartorsiuisoqarneralu peqqissutsimut naalakkersuisoqarfiup oqaaseqarfigerusunngilaa.
Assi © : KNR
Allattoq Dorthea Johansen, Anton Gundersen Lihn
januaarip 09-at 2018 09:05
Nutserisoq Simon Uldum -

Peqqissutsimut naalakkersuisoqarfiup nakkutilliisuisa imigassamut inatsisip Tasiilami unioqqutinneqarsimanera siorna decembarip qaammataata qiteqqunnerani nakkutilliinermit nalunaarusiaminni allaaseraat, tamannalu Sermitsiaq.AG-p sapaatit akunnerata siuliani oqaluttuarineqarpoq.

Pingaartumillu imerniartarfiit marluk 'Klubben' aamma 'Diskotek/krostuen' nalunaarusiami sakkortuumik isornartorsiorneqarput, ilaatigut nakkutilliisoqarnerata nalaani ukiukitsunut imigassamik sassaalliuteqarsimanertik imerniartarfimmilu isersimasut tamarmik malunnartumik aalakoornerat pissutigalugu.
 
Arctic Wonderland Toursip pisortaa, Mike Nicolaisen, 'Diskotek/krostuen'-imik piginnittoq ajornartorsiutit aaqqiissuteqarfiginiarlugit nalunaarusiaq tunngavigalugu suliniutinik arlalinnik aallartisaasimavoq.
 
Tamatumali peqatigisaanik nalunaarusiap pitsaassusia nakkutilliisullu naliliinerat qularnartoqartippaa, Kommuneqarfik Sermersuumut allagarluni taama allappoq.
 
- 12-15-inik ukiulinnik issiasoqarnera allaallu "inuit ikinnerpaamik 15-it pineqartut" ilumuunngilluinnarpoq uppernarsaatissartaqanngitsumillu oqalunnerulluni, pisortaq taama allappoq.
 
Mike Nicolaisenip nalunaarusiaq ilaannakuunerarpaa naliliinerillu piviusorsiunngitsumik naliliinerunerarlugit, aamma nakkutilliisut aallartitaata imerniartarfimmi isersimasut ukiuinik qanorlu aalakoortiginerinik nalilersuinissamut piginnaasai qanoq-ittuunersut apeqqutigaa.

AAMMA ATUARUK Islandimi imigassamik pinaveersaartitsineq iluatsilluartoq nunatsinni atussasoq

Imerniartarfimmillu piginnittup tamatumunnga atatillugu nakkutilliisunit utoqqatserfigineqarnissani piumasaraa.
 
Nakkutilliisut nalunaarusiaata isornartorsiorneqarnera Peqqissutsimut naalakkersuisoqarfiup KNR-imut oqaaseqarfigerusunngilaa. Suliap imerniartarfiit Kommuneqarfik Sermersuumilu kommunalbestyrelsip akornanni maanna suliassanngornera naalakkersuisoqarfiup pisortaata Tine Parsip innersuussutigaa.
 
Suliat pineqartut kommunip aningaasaqarnermut inuussutissarsiornermullu ataatsimiititaliaata februaarip arfineq-pingajuani ataatsimiinnermini suliarissavai.

AAMMA ATUARUK Imigassaq silaarunnartulik pillugu inatsisissaq kinguartinneqartoq

AAMMA ATUARUK Pisiniarfissuit imigassaq pillugu inatsisissamut akerliussutsimik takutitsiniartut

 

Aamma atuaruk