Pisiniarfissuit imigassaq pillugu inatsisissamut akerliussutsimik takutitsiniartut
Imigassaq pillugu siunnersuut malillugu, baajat, viinnit imigassallu kimittuut tuniniarneqartut saqqummisumiitikkunnaarlugit assersorneqarsimasuni pisiniarineqartalissapput, pisinniarfinnilu immikkuullarissuni tuniniarneqartalissallutik tuniniarneqartullu ussassaarusiarineqartarunnaassallutik.
Pisiffik Brugsenilu naapertorlugit pisiniarfinni allanngortiterinissanut aalajangersimasunillu sulisoqalernissanut pisiniarfiit aningaasartuuteqarlertussaammata tamatuma kingunerisaanik akitsuisoqartariaqassaaq.
Pisiniarfeqarfiillu ataatsimoorlutik imigassaq pillugu siunnersuummut akerliunertik takutinniarlugu pisinniarfinni taakkunani marlunni tassa Nuup qeqqani akerliussutsiminnik takutitsiniarput.
Akerliussutsimik takutitsisoqalerpat imigassat tuniniarneqartut assersorneqarsimasuni pisiassaassapput, assersuiffiusunilu taamaallaat pisisoqarsinnaassalluni. Taamaaliornikkut inatsisissatut siunnersuut akuerineqassappat qanoq kinguneqassanersoq pisinniarfinnit takutikkusunneqarpoq.
Pisiniarfiit marluk ataatsimoortumik taama tusagassiutinut nalunaaruteqarput.
Pisiniarfeqarfiit neriuutigaat, Inatsisartut imigassaq pillugu siunnersuut taamaatiinnassagaat oqaloqatigiinnerlu aallartillugu. Taakkumi politikerinik oqaloqateqarusupput pinaveersaartitsinissamullu peqataarusullutik
- Neriuutigaarput nioqquteqarfiit, peqatigiiffiit aammalu pisortat akornanni oqaloqatigiinnikkut
suleqatigiinnikkullu imigassamik aalakoornartulimmik atuineq annikillisarniarlugu
suleqatigiisitaliortoqarumaartoq, Pisiffimmi ussassaarinermi piniartarnermilu
pisortaaneq Heine Stilling Jensen aamma Brugsenimi tuniniaanermi pisortaq, Jes Nyborg
Brugsenimeersoq taama oqarput
Imigassaq pillugu inatsisissatut siunnersuut ataasinngorpat novembarip ulluisa arfernani Inatsisartuni aappassaaneerneqassaaq, akuerineqassappallu aappaagu martsip aallaqqaataanit atuutilissalluni
